Ի՞նչ է մետապնեւմավիրուսը, եւ որքանո՞վ է այն վտանգավոր

Չինաստանում տարածվում է մետապնեւմավիրուսը, որը հայտնի է նաեւ որպես HMPV, այն հարցեր է առաջացնում այն մասին, թե ինչ հիվանդություն է դա եւ արդյոք խնդիր է ԱՄՆ բնակիչների համար, տեղեկացրել է CBS News-ը։

Առողջապահության ոլորտի չինացի պաշտոնյաները չեն հաստատել, որ HMPV-ն երկրում հոսպիտալացումների պատճառն է, եւ Չինաստանի Հիվանդությունների վերահսկման եւ կանխարգելման կենտրոնի վերջերս ներկայացրած հաշվետվությունները մատնանշում են, որ աճն իրականում կարող է պայմանավորված լինել А գրիպով։ Բայց ԱՄՆ-ում HMPV-ի մասին ցածր իրազեկության հետ կապված՝ ավելացել են երկյուղները պոտենցիալ նոր համավարակի առնչությամբ, չնայած փորձագետները նշում են, որ անհանգստանալու առիթ չկա։

«Համավարակի առիթով երկյուղները կարելի է ցրել»,- CBS News-ին ասել է Plano Մանկական բժշկական կենտրոնի տնօրեն, դոկտոր Կառլա Գարսիա Կարենոն՝ ավելացնելով, որ վիրուսը ոչ միայն բավական կայուն չէ, այլեւ նոր չէ, ինչպես COVID-19-ն էր։ «Այն շրջանառվում է արդեն որոշ ժամանակ, ուստի որոշ մարդիկ իմունիտետ ունեն այդ մետապնեւմավիրուսի դեմ»։

HMPV-ը վիրուս է, որը կարող է առաջացնել վերին եւ ստորին շնչուղիների հիվանդություններ բոլոր տարիքի մարդկանց մոտ։ Փոքր երեխաները, տարեց մարդիկ եւ թույլ իմունիտետ ունեցողները առավել շատ են ենթարկված վիրուսից հիվանդանալու վտանգին։

Հիվանդության տեւողությունը տատանվում է՝ կախված ծանրությունից։ Հիվանդությունը նման է շնչառական այլ վարակներին, որոնք առաջանում են վիրուսներից։

HMPV-ի ախտանշաններն են

• հազ
• տենդ
• քթի խցանվածություն
• հեւոց։

Կլինիկական ախտանշանները կարող են սկսվել բրոնխիտից կամ թոքաբորբից եւ նման են այլ վիրուսների ախտանշաններին, որոնք առաջ են բերում վերին եւ ստորին շնչուղիների վարակներ։

Արդյո՞ք HMPV-ն նոր վիրուս է

HMPV-ն նոր վիրուս չէ։ Այն առաջին անգամ հայտնաբերվել է 2001թ. եւ Pneumoviridae ընտանիքի մի մասն է կազմում՝ շնչառական սինցիտիալ վիրուսի կամ RSV-ի հետ միասին։

Միացյալ Նահանգներում HMPV-ն սովորաբար շրջանառվում է ձմռանը եւ շարունակվում է մինչեւ գարուն կամ ամբողջ գարնան ընթացքում, եւ կարող է շրջանառվել RSV-ի եւ գրիպի հետ միաժամանակ շնչառական վիրուսային սեզոնի ընթացքում:

HMPV-ն ավելի վատ է, քան COVID-ը՞

Փորձագետներն ասում են, որ Չինաստանում HMPV-ի բռնկումը մեծ մտահոգություն չէ. այն նոր, առեղծվածային հիվանդություն չէ եւ պատասխանատու չէ այնքան դեպքերի համար, որքան COVID-ը կամ այլ վարակները նույնիսկ այս սեզոնին: Ըստ վերջին տվյալների՝ HMPV-ին բաժին է ընկնում շնչառական վիրուսների համար շաբաթական դրական թեստերի 2 տոկոսից քիչ: Համեմատության համար. նույն շաբաթվա ընթացքում գրիպը կազմել է գրեթե 19 տոկոս, իսկ COVID-ի դեպքում՝ 7 տոկոսից մի փոքր ավելի:

Հետազոտողները հաշվարկել են, որ երեխաների շնչառական հիվանդությունների 10-12 տոկոսը պայմանավորված է HMPV-ով, ըստ Քլիվլենդի կլինիկայի տվյալների: «Դեպքերի մեծ մասը թեթեւ է, բայց երեխաների 5-16 տոկոսի մոտ զարգանում է ստորին շնչուղիների վարակ, ինչպիսին է թոքաբորբը»,- նշվել է կլինիկայի կայքում:

HMPV-ի փոխանցումը եւ կանխարգելումը

HMPV-ն փոխանցվում է հիվանդի հետ անմիջական շփման կամ վիրուսով վարակված առարկաների դիպչելու միջոցով:

«Ցավոք, գրիպի, RSV-ի եւ COVID-ի համեմատ մենք չունենք պատվաստանյութ մետապնեւմավիրուսի դեմ, ուստի մենք չունենք մեր իմունային համակարգը նախապատրաստելու կամ ամրապնդելու առավելություն այս վիրուսների դեմ պայքարելու համար»,- ասել է Գարսիա Կարենոն:

Հիվանդությունը կանխելու համար կատարեք նույն քայլերը, որոնք ձեռնարկում եք այլ շնչառական վիրուսների կանխարգելման համար, այսինքն՝ լվացեք ձեռքերը օճառով եւ ջրով եւ խուսափեք հիվանդ մարդկանց հետ սերտ շփումից:

«Եթե ինչ-որ մեկը հիվանդացել է, փորձեք խուսափել մարդշատ վայրերից, որպեսզի չվարակեք բոլորին, հատկապես խոցելի մարդկանց: Եթե ​​այդ անձը հիվանդ է եւ չի կարող խուսափել այլ վայր գնալուց, ապա պետք է դիմակ օգտագործի, պահպանի հազի եւ փռշտալու վարվեցողությունը եւ լավ լվա ձեռքերը»,- ասել է բժիշկը։

Հետևեք NEWS.am Medicine-ին Facebook-ում և Twitter-ում