Օրական 60 գ-ից ավելի նուշի օգտագործումը կարող է էականորեն նվազեցնել օքսիդատիվ սթրեսը և պաշտպանել բջիջները վնասվածքներից, այդ թվում՝ ԴՆԹ-ն, ինչը նվազեցնում է քրոնիկ հիվանդությունների, ինչպիսիք են սիրտ-անոթային հիվանդությունները, շաքարախտը, քաղցկեղը և նեյրոդեգեներատիվ խանգարումները, ռիսկը, գրում են գիտնականները Nature ամսագրում։
Հետազոտությունները ցույց են տվել, որ նուշը հարուստ է հակաօքսիդանտներով, այդ թվում՝ վիտամին E-ով, պոլիֆենոլներով և մոնոչհագեցած ճարպերով, որոնք օգնում են չեզոքացնել թթվածնի ռեակտիվ տեսակները (ROS)՝ բջիջները վնասող անկայուն մոլեկուլներ։ Նուշի պարբերաբար օգտագործումը նպաստում է օրգանիզմի հակաօքսիդանտային ակտիվության բարելավմանը՝ նվազեցնելով բջջային վնասվածքի մարկերների, ինչպիսիք են MDA-ն և 8-OHdG-ն, մակարդակը։
Սակայն կարևոր է հաշվի առնել, որ նուշի արդյունավետությունը կախված է չափաբաժնից և դրա պատրաստման եղանակից։ Նուշի բովումը կարող է 26%-ով նվազեցնել պոլիֆենոլների պարունակությունը, ինչը նվազեցնում է դրա հակաօքսիդանտային հատկությունները՝ հում նուշի համեմատ։
Առավելագույն արդյունքի հասնելու համար խորհուրդ է տրվում օրական օգտագործել մոտ 60 գ նուշ, ինչը համարժեք է երկու մեծ բուռ նուշի։
Նուշն ամենօրյա սննդակարգում ներառելը կարող է դառնալ առողջությունը պահպանելու և քրոնիկ հիվանդությունները կանխարգելելու պարզ և մատչելի միջոց։
Հետևեք NEWS.am Medicine-ին Facebook-ում և Twitter-ում