Մինչև 2050 թվականը Եվրոպայում դեմենցիայով տառապող մարդկանց թիվը կաճի գրեթե երկու երրորդով (64%)։ Դրա մասին ասվում է Ալցհայմերի հիվանդության հետազոտությունների եվրոպական կազմակերպության (Alzheimer Europe) նոր զեկույցում։
Մասնագիտական գնահատականներով՝ մինչև 2025 թվականը ԵՄ-ի 27 երկրում դեմենցիայով տառապում է ավելի քան 9 միլիոն մարդ, իսկ եթե հաշվի առնենք ԵՄ-ից դուրս եվրոպական երկրները՝ ավելի քան 12 միլիոն։ Գիտնականների կարծիքով՝ մինչև 2050 թվականն այդ թվերը կհասնեն համապատասխանաբար 14,3 միլիոնի և գրեթե 19,9 միլիոնի։ Դա նշանակում է, որ դեմենցիայով բուժառուների թիվը ԵՄ-27-ում կաճի 58%-ով և ամբողջ Եվրոպայում՝ 64%-ով։
Զեկույցը հիմնված է թարմացված ժողովրդագրական տվյալների վրա և շարունակում է 2019 թվականի դեմենցիայի եվրոպական տարեգրքում նախկինում ներկայացված վերլուծությունը։ Ընդհանուր առմամբ, ԵՄ-ում դեմենցիայով տառապող մարդկանց ընդհանուր թիվը, որը կանխատեսվում էր 2025 և 2050 թվականների համար, համեմատելի էր նախորդ գնահատականների հետ։
Այնուամենայնիվ, հետազոտողները նկատել են դեպքերի տարածվածության կարևոր փոփոխություններ. տղամարդկանց շրջանում դեմենցիայի տարածվածության մակարդակն ավելի բարձր էր 70 տարեկանից բարձր բոլոր տարիքային խմբերում, մասնավորապես՝ 70-74 տարեկանների մեջ: Կանանց շրջանում ցուցանիշներն ավելի խառն էին։
Alzheimer Europe-ն ընդգծում է, որ հիվանդների թվի սպասվող աճը հաստատում է անհապաղ գործողությունների անհրաժեշտությունը: Սա ներառում է առողջապահական և սոցիալական աջակցության համակարգերի մշակում, որոնք կարող են խնամք տրամադրել դեմենցիայով տառապող մարդկանց բոլոր փուլերում՝ ախտորոշումից մինչև կյանքի վերջի խնամք։
Հետազոտողները նշել են, որ դեմենցիան համախտանիշ է, որը բնութագրվում է հիշողության, մտածողության, հստակ արտահայտվելու ունակության և տարածական կողմնորոշման աստիճանական անկմամբ: Դեմենցիան ծերացման բնական մաս չէ. այսօր դրա հիմնական պատճառը համարվում է գլխուղեղի օրգանական վնասվածքը՝ առաջացած վնասվածքի, հիվանդության կամ թունավոր սպիտակուցների կուտակման հետևանքով:
Հետևեք NEWS.am Medicine-ին Facebook-ում և Twitter-ում