«Nutrients» ամսագրում հրապարակված միջազգային խոշոր հետազոտությունը պարզել է, որ 50 տարեկանից բարձր մարդկանց մոտ սպիտակուցի ցածր օգտագործումը կապված է մկանային ուժի ավելի արագ անկման և առօրյա գործողություններ կատարելու ունակության խանգարման հետ։
Հետազոտությունն անցկացվել է ԱՄԷ, Դանիայի, Ֆինլանդիայի, Պակիստանի, Սաուդյան Արաբիայի և Ավստրիայի համալսարանների հետազոտական խմբի կողմից՝ Ռիզվան Քայսարի (Շարժայի համալսարան) գլխավորությամբ։
Հետազոտողները վերլուծել են 27 եվրոպական երկրներից ավելի քան 38 հազար մեծահասակների տվյալներ, որոնք հավաքվել են Եվրոպայում առողջության, ծերացման և թոշակի անցնելու երկարաժամկետ հարցման շրջանակում։ Հետազոտությունն անցկացվել է մի քանի տարիների ընթացքում, ինչը թույլ է տվել սննդային սովորությունները կապել ֆիզիկական պատրաստվածության փոփոխությունների հետ։
Հետազոտությունը կենտրոնացել է սպիտակուցներով հարուստ սննդամթերքների վրա՝ ձու, լոբազգիներ, ձուկ, հավ և կաթնամթերք։ Հետազոտությունը պարզել է, որ մարդիկ, որոնք պարբերաբար ավելի քիչ սպիտակուց են օգտագործել, ավելի հավանական է, որ ժամանակի ընթացքում նրանք ունենային մկանային ուժի անկում և առօրյա գործողություններ կատարելու դժվարություններ։
Խոսքն այնպիսի բազային գործողությունների մասին է, ինչպիսին են՝
աստիճաններ բարձրանալը կարճ հեռավորություններ քայլելը աթոռից վեր կենալը ձեռքերը բարձրացնելը կենցաղային խնդիրներ, այդ թվում՝ գնումներ կատարելը։Գիտնականներն ընդգծել են, որ նման սահմանափակումներն անմիջականորեն կապված են անկախության կորստի, կյանքի որակի նվազման, ընկնելու, հոսպիտալացման և խնամքի անհրաժեշտության բարձրացման հետ։
Հետազոտության ղեկավար Ռիզվան Քայսարի խոսքով՝ նույնիսկ պարզ շարժումները պահանջում են բավականաչափ մկանային ուժ, համակարգում և հավասարակշռություն։ Երկարատև սպիտակուցային անբավարարության դեպքում օրգանիզմն ավելի քիչ է կարողանում աջակցել այս համակարգերին, ինչն արագացնում է ֆունկցիոնալ ծերացումը։
Վերլուծությունը նաև բացահայտել է տարբերություններ տղամարդկանց և կանանց միջև. տղամարդկանց մոտ սպիտակուցի հետ ավելի ուժեղ է կապված եղել մկանային ուժը (օրինակ՝ բռնելու ուժը), մինչդեռ կանանց մոտ ֆիքսվել են ֆունկցիոնալ սահմանափակումներ՝ դժվարություններ քայլելիս, թեքվելիս, ձեռքերը բարձրացնելիս և առօրյա գործողություններ կատարելիս։
Հեղինակներն ընդգծել են, որ խոսքը սպորտային հավելումների մասին չէ, այլ առօրյա սննդակարգի։ Սովորական սննդամթերքների՝ ձկան, ձվի, լոբազգիների, կաթնամթերքի և թռչնամսի կանոնավոր օգտագործումը կարող է կարևոր դեր խաղալ ծերության շրջանում մկանների և ֆունկցիոնալ ակտիվության պահպանման գործում։ Հետազոտողների կարծիքով՝ քիչ սպիտակուց օգտագործող մարդկանց բացահայտումը կարող է լինել պարզ և էժան միջոց տարիքային շարժունակության անկումը կանխելու և անկախությունը պահպանելու համար
Հետևեք NEWS.am Medicine-ին Facebook-ում և Twitter-ում