Կյանքի առաջին տարում երեխաների սննդակարգում ձվի ներմուծումը կարող է էապես նվազեցնել ձվի նկատմամբ ալերգիայի զարգացման հավանականությունը։ Նման եզրակացության են հանգել ավստրալացի հետազոտողները։
JAMA Pediatrics բժշկագիտական հանդեսում հունիսի 8-ին հրապարակված աշխատանքի արդյունքները ցույց են տվել, որ ձվի նկատմամբ ալերգիայի տարածվածությունը զգալիորեն նվազել է, երբ Ավստրալիան թարմացրել է մանկական սննդի վերաբերյալ ուղեցույցները և սկսել է խորհուրդ տալ ձուն սննդակարգ ներմուծել մոտավորապես վեց ամսական հասակից։
Ամենից արտահայտված ազդեցությունը նկատվել է էկզեմա ունեցող երեխաների շրջանում, որը համարվում է ալերգիկ հիվանդությունների զարգացման ռիսկի գործոններից մեկը։ Այս խմբում ձվի նկատմամբ ալերգիա ունեցող երեխաների մասնաբաժինը վերջին տասնամյակում մոտ 35%-ից կրճատվել է մինչև շուրջ 22%-ի։
Հետազոտության հեղինակները՝ Քվինսլենդի համալսարանի դոցենտ Ջեննիֆեր Քոփլինի գլխավորությամբ, նշում են, որ ստացված տվյալները պոպուլյացիոն մակարդակով համոզիչ ապացույց են, որ մանկական սննդակարգի թարմացված հանձնարարականներն ընդհանուր լայն կիրառման դեպքում ընդունակ են նվազեցնել սննդային ալերգիայի տարածվածությունը։
2010-ական թվականների վերջին մի շարք երկրներ, ներառյալ ԱՄՆ-ը, վերանայեցին ալերգիայի կանխարգելման իրենց ուղեցույցները՝ սկսելով խորհուրդ տալ երեխաներին ավելի վաղ տարիքից ծանոթացնել տարածված ալերգենների, մասնավորապես՝ ձվի և գետնանուշի հետ։ Ավստրալիան պաշտոնապես թարմացրեց իր հանձնարարականները 2016 թվականին՝ առաջարկելով հնարավոր ալերգենիկ մթերքները ներմուծել կյանքի առաջին տարվա ընթացքում։
Այս փոփոխությունների արդյունավետությունը գնահատելու համար գիտնականները վերլուծել են Մելբուռնում ավելի քան 7200 երեխաների տվյալներ։ Համեմատվել են ալերգիայի ցուցանիշները մինչև հանձնարարականների թարմացումը (2007–2011 թվականներ) և դրանց ներդրումից հետո (2018–2019 թվականներ)։
Ժողովրդագրական տարբերությունների ուղղումից հետո հետազոտողները պարզել են, որ ձվի նկատմամբ ալերգիայի տարածվածությունը նվազել է գրեթե 18%-ով։
Ըստ մասնագետների՝ արդյունքները հաստատում են ալերգիայի կանխարգելման ժամանակակից մոտեցումների արդյունավետությունը։ Ինչպես պարզաբանում է Northwell Health-ի ալերգոլոգ-իմունոլոգ դոկտոր Ջինա Կոսցիան, սննդի միջոցով ալերգենների վաղ հայտնվելը օրգանիզմում նպաստում է իմունային հանդուրժողականության ձևավորմանը, մինչդեռ վնասված մաշկի միջոցով սկզբնական շփումը, ընդհակառակը, կարող է բարձրացնել ալերգիկ ռեակցիայի ռիսկը։
Այս մեխանիզմը կարող է բացատրել, թե ինչու ձվի վաղ ներմուծումից ամենամեծ օգուտը ստացել են հենց էկզեմայից տառապող երեխաները։ Մաշկի պաշտպանիչ պատնեշի խախտման պատճառով նման մանկիկները հատկապես հակված են սննդային ալերգիայի զարգացմանը։
Փորձագետն ընդգծում է, որ երեխային պոտենցիալ ալերգենների հետ ծանոթացնելը պետք է իրականացվի մանկաբույժի հսկողությամբ, իսկ մթերքը ներմուծելուց հետո կարևոր է այն կանոնավոր կերպով ներառել օրաբաժնում։ Ալերգենի հետ շփման պահպանումը շաբաթական մի քանի անգամ օգնում է պահպանել հանդուրժողականությունը և նվազեցնել ապագայում ալերգիայի զարգացման հավանականությունը։
Ստացված արդյունքները լրացնում են գիտական տվյալների աճող ծավալը, որոնք վկայում են այն մասին, որ վաղ տարիքում ալերգենիկ մթերքների ժամանակին ներմուծումը կարող է երեխաների սննդային ալերգիայի կանխարգելման կարևոր գործիք դառնալ։
Հետևեք NEWS.am Medicine-ին Facebook-ում և Twitter-ում