Արևմտյան Նեղոսի վիրուսը արդեն հայտնաբերվել է Եվրոպայի 12 երկրներում

Հիվանդությունների կանխարգելման և վերահսկման եվրոպական գործակալության (ECDC) տվյալներով՝ այս տարի Արևմտյան Նեղոսի վիրուսի վարակի դեպքեր արդեն հայտնաբերվել են Եվրոպայի 12 երկրներում։ Գործակալությունը կոչ է արել եվրոպական երկրներին ուժեղացնել վարակը փոխանցող մոծակների դեմ պայքարի միջոցառումները։

Վիրուսի տեղական փոխանցման դեպքեր գրանցվել են Ալբանիայի, Ավստրիայի, Ֆրանսիայի, Գերմանիայի, Հունաստանի, Իտալիայի, Կոսովոյի, Նիդեռլանդների, Հյուսիսային Մակեդոնիայի, Ռումինիայի, Սերբիայի և Իսպանիայի 99 շրջաններում։ Ամենաշատ դեպքերը գրանցվել են Իտալիայում (311 դեպք), որին հաջորդում է Հունաստանը (157)։ 21 շրջաններում հայտնաբերվել է վիրուսը առաջին անգամ։

Համեմատության համար․ 2025 թվականի օգոստոսի նույն ժամանակահատվածում տեղական փոխանցման դեպքեր գրանցվել են ինը եվրոպական երկրների 67 շրջաններում։

ECDC-ում նշել են, որ Արևմտյան Նեղոսի վիրուսի և ինվազիվ մոծակների տեսակների տարածումը ցույց է տալիս պոպուլյացիայի վերահսկողության ուժեղացման անհրաժեշտությունը։ Գործակալության սննդի, ջրի և հիվանդությունները փոխանցողների բաժնի ղեկավար Սելին Գոսները նշել է, որ արդյունավետ վերահսկողությունը պահանջում է մոծակների պոպուլյացիաների մոնիթորինգ, հանրային իրազեկվածություն և թիրախային վերահսկողության միջոցառումներ, որոնք հաշվի են առնում ազդեցությունը շրջակա միջավայրի վրա։

Եվրոպայում մարդկանց վարակվելու դեպքերի մեծ մասը տեղի է ունենում ուշ գարնանից մինչև աշուն ընկած ժամանակահատվածում, իսկ փոխանցման գագաթնակետը սովորաբար տեղի է ունենում հուլիս-սեպտեմբեր ընկած ժամանակահատվածում։

Արևմտյան Նեղոսի վիրուսը հիմնականում փոխանցվում է Culex ցեղի մոծակների միջոցով: Վարակված անձինք կարող են ունենալ թեթև վարակ՝ գրիպանման ախտանիշներով, սակայն ծանր դեպքերը կարող են ներառել բարձր ջերմություն, դող, կոմա, մենինգիտ և էնցեֆալիտ՝ կյանքին սպառնացող ուղեղի բորբոքում:

Վիրուսի հատուկ բուժում չկա, դեռևս չկա մարդկանց համար հավանության արժանացած պատվաստանյութ: Ծանր դեպքերում հիվանդները ստանում են օժանդակ խնամք:

Միևնույն ժամանակ, ասիական վագրամոծակը (Aedes albopictus), որը կարող է փոխանցել դենգեի և չիկունգունյա վիրուսներ, շարունակում է տարածվել Եվրոպայում: Ըստ ECDC-ի՝ այն արդեն իսկ հաստատվել է 16 եվրոպական երկրներում՝ երկու անգամ ավելի, քան 12 տարի առաջ:

Հետևեք NEWS.am Medicine-ին Facebook-ում և Twitter-ում