Ավելի շատ բուսական սպիտակուց՝ ավելի բարձր տեստոստերո՞ն. ի՞նչ է պարզել հետազոտությունը

2546 տղամարդու մասնակցությամբ անցկացված ուսումնասիրությունը ցույց է տվել, որ ամենաշատ կենդանական սպիտակուց օգտագործողների մոտ տեստոստերոնի մակարդակն ավելի ցածր է եղել, քան այն նվազագույն քանակությամբ սպառողների մոտ։ Մինչդեռ ամենաշատ բուսական սպիտակուց օգտագործող տղամարդկանց պարագայում արձանագրվել է հակառակ պատկերը։

Տեստոստերոնը հիմնական արական սեռական հորմոնն է, որը մասնակցում է սեռական ֆունկցիայի կարգավորմանը, մկանների զարգացմանը և ոսկորների առողջության պահպանմանը, փոխանցում է Euronews-ը։ Դրա մակարդակը տատանվում է՝ կախված տարիքից, մարմնի զանգվածից և այլ գործոններից, ինչը բարդացնում է մարդու սննդակարգի որևէ առանձին բաղադրիչի ազդեցության հստակ գնահատումը։

Կաթնամթերքից ստացվող սպիտակուցի ավելի մեծ քանակի օգտագործումը կապված է եղել տեստոստերոնի և սեռական հորմոնները կապող գլոբուլինի ավելի ցածր ընդհանուր մակարդակի հետ։ Մսից ստացվող սպիտակուցի սպառումը, հակառակը, կապել են սեռական հորմոնները կապող գլոբուլինի ավելի ցածր խտության, սակայն ոչ ընդհանուր տեստոստերոնի մակարդակի հետ։

Բանջարեղենից և ոչ հացահատիկային այլ աղբյուրներից ստացվող բուսական սպիտակուցի ավելի մեծ քանակի օգտագործումը կապված է եղել ընդհանուր տեստոստերոնի ավելի բարձր մակարդակի հետ։

Արևելյան Ֆինլանդիայի համալսարանի գիտնականները վերլուծել են Ֆինլանդիայի արևելյան շրջաններում բնակվող 42-60 տարեկան տղամարդկանց տվյալները։ Նրանց սննդակարգը գրանցվել է չորս օրվա ընթացքում՝ 1984-ից 1989 թվականներն ընկած ժամանակահատվածում, իսկ արյան նմուշներն օգտագործվել են ընդհանուր տեստոստերոնի և արյան մեջ տեստոստերոնի մակարդակի վրա ազդող սպիտակուցի՝ սեռական հորմոնները կապող գլոբուլինի չափման համար։

Ամենաշատ կենդանական սպիտակուց օգտագործած տղամարդկանց խմբում ընդհանուր տեստոստերոնի միջին մակարդակը 1,2 նանոմոլ/լիտրով ավելի ցածր է եղել, քան այն ամենաքիչն սպառած մասնակիցների մոտ։ Բուսական սպիտակուցի դեպքում պատկերը հակառակն էր. ամենաշատն օգտագործողների խմբում գտնվող տղամարդկանց մոտ տեստոստերոնի մակարդակը 1,1 նանոմոլ/լիտրով ավելի բարձր է եղել, քան ամենաքիչն սպառողների մոտ։

Իրենց վերլուծություններում գիտնականները հաշվի են առել տարիքը, մարմնի զանգվածի ինդեքսը, ինչպես նաև սննդակարգի, ապրելակերպի և առողջական վիճակի հետ կապված մի շարք այլ գործոններ։

Ֆիննական ուսումնասիրությունը չի ապացուցում, որ կենդանական սպիտակուցը նվազեցնում է տեստոստերոնի մակարդակը, կամ որ բուսական սննդակարգի անցնելը բարձրացնում է այն։

Հետազոտությունն իրականացվել է լայնակի հատույթի մեթոդով (поперечный срез), այսինքն՝ ուսումնասիրվել են առկա փոխադարձ կապերը, այլ ոչ թե պատճառահետևանքային օրինաչափությունները։

«Թեև տեստոստերոնի խտության հարցում հայտնաբերված տարբերությունները վիճակագրորեն նշանակալի էին, դրանք հարաբերականորեն փոքր էին»,- արդյունքների վերաբերյալ համալսարանի տարածած հաղորդագրության մեջ նշել է Արևելյան Ֆինլանդիայի համալսարանի դոկտորանտ Միիկա Ուին-Էլիսը։