Երեւանի պոլիկլինիկաներում կան մի շարք խնդիրներ, որոնք ուշադրություն եւ լուծում են պահանջում: Ամենաարդիական խնդիրներից մեկը պոլիկլինիկայի շենքերի խնդիրն է: Դրանցից շատերն անչափ հին են ու վերանորոգման կարիք ունեն:
Պատասխանելով NEWS.am Medicine-ի հարցերին՝ քաղաքապետարանի առողջապահության վարչության պետ Կամսար Բաբինյանը նշեց, որ քաղաքապետարանը տեղյակ է առկա խնդիրների մասին եւ փորձում է հնարավորինս լուծել դրանք: Նրա խոսքով՝ պոլիկլինիկաների շենքերն իսկապես վերանորոգման կարիք ունեն, եւ վերջին տարիներին նմանատիպ աշխատանք տարվում է: Մասնավորապես, 2014 թվականին երեք պոլիկլինիկաներում ջեռուցման համակարգ է տեղադրվել, մեկում փոխել են պատուհաններն ու դռները: 2013 թվականին նմանատիպ աշխատանքներ են տարվել նաեւ քաղաքի մանկական երկու պոլիկլինիկայում:
«Այս տարի եւս այս աշխատանքների համար միջոցներ են հատկացվել, դրանք աստիճանաբար կատարվում են: Բոլոր խնդիրները միանգամից լուծել չի հաջողվի, բայց ժամանակի ընթացքում ամեն ինչ իր տեղը կընկնի», - նշեց Կամսար Բաբինյանը:
Մեր զրուցակիցը հավելեց նաեւ, որ վերջին երկու-երեք տարվա ընթացքում պոլիկլինիկաներից շատերը նոր սարքավորումներ են ստացել:
«Մենք ցանկանում ենք բարձրացնել քաղաքացիների վստահության մակարդակը պոլիկլինիկաների նկատմամբ», - նշում է Կամսար Բաբինյանը՝ ընդգծելով, որ ցանկություն կա նաեւ ստեղծել այնպիսի պայմաններ, որ բոլոր հետազոտություններն իրականացվեն նորագույն սարքավորումների միջոցով:
Մասնավորապես, Կ. Բաբինյանի խոսքով, 2014 թվականին երկու պոլիկլինիկա արդեն ստացել է ժամանակակից ռենտգեն սարքավորումներ, ինչպես նաեւ ՈւՁՀ սարքավորումներ եւ լաբորատոր հետազոտությունների համար անհրաժեշտ այլ գործիքներ:
Հետևեք NEWS.am Medicine-ին Facebook-ում և Twitter-ում