Վալենտինի օրը ավստրալուհի Ջո Գիլհրիստը երկար կհիշի, քանի որ հենց այդ օրը նրա օրգանիզմում սկսել է զարգանալ ոսկեգույն ստաֆիլոկոկի ինֆեկցիան, որը ժամանակի ընթացքում ախտահարել է նրա ողնաշարը:
Այն բանից հետո, երբ նրա մոտ անտանելի ցավեր են սկսվել մեջքի հատվածում, աղջկան հոսպիտալացրել են: Կինը մինչ օրս գտնվում է Բրիսբենի հիվանդանացում, որտեղ նրա օրգանիզմը փորձում են մաքրել ախտածին բակտերիաներից:
«Ամեն ինչ սկսվեց մեջքի հատվածում աննշան ցավերից եւ ես մտածեցի, որ դա ոչ ճիշտ կեցվածքի հետեւանք է, - պատմում է աղջիկը, - բայց ամեն օր ցավն ավելի էր ուժեղանում: Ի վերջո, հաբերն արդեն չէին օգնում եւ ես սկսեցի մտածել, որ մահանում եմ: Ես այդպիսի ցավեր չեմ ապրել նույնիսկ ծննդաբերության ընթացքում»:
Բժիշկներին շատ ժամանակ է պահանջվել՝ հասկանալու համար, թե ինչ է կատարվում Ջոյի հետ: Իսկ նրա մարմինն արդեն անգզայանում էր, ոտքերը չէին շարժվում: Դրանից հետո կնոջը իր հայրենի Ուորվիքից ուղղաթիռով տեղափոխել են Բրիսբեն՝ շտապ վիրահատություն անցկացնելու համար: Երբ նա գիտակցության է եկել, իմացել է, որ ոսկեգույն ստաֆիլոկոկի զոհ է դարձել: Նշենք, որ վերջինս հակաբիոտիկների նկատմամբ կայուն ինֆեկցիա է, որը մուտք է գործել Ջոյի օրգանիզմ հարդարման վրձնի միջոցով:
Այդ վրձինը պատկանում էր Ջոյի ընկերուհուն, որը մաշկի ստաֆիլոկոկային ինֆեկցիայով էր տառապում: Ջոն ընդամենը ուզում էր թաքցնել դեմքի բշտիկը, սակայն վտանգավոր ինֆեկցիայի զոհ դարձավ, որը այնքան ուժեղ է վնասել նրա ողնաշարը, որ նա, հավանաբար, այլեւս ոտքի չի կանգնի: Բացի այդ՝ նա զրկվել է սեփական աղիքային համակարգն ու միզապարկը վերահսկելու հնարավորությունից: Մյուս կողմից՝ ամեն ինչ կարող էր շատ ավելի վատ լինել՝ եթե բակտերիաները հայտնվեին նրա ուղեղում, նա կարող էր մահանալ, իսկ եթե վերջույթներում՝ անդամահատության անհրաժեշտություն ի հայտ կգար:
Հետևեք NEWS.am Medicine-ին Facebook-ում և Twitter-ում