Գիտնականները պնդում են, որ բոտոկսը կարող է ներթափանցել մարդու կենտրոնական նյարդային համակարգ: Համապատասխան հոդվածը լույս է տեսել The Journal of Neuroscience ամսագրում:
Բոտոկսը սպիտակուցային խմբի նեյրոտոկսինն է եւ գիտությանը հայտնի ամենաուժեղ բնական թույնը: Այս թույնի ներթափանցումը մարդու կամ կենդանու օրգանիզմ բոտուլիզմ է առաջացնում: Ներկայումս թույնը ակտիվորեն օգտագործվում է կոսմետիկ նպատակներով, դրա ներարկումներն օգնում են ազատվել կնճիռներից՝ կասեցնելով դեմքի մկանների եւ շարժողական նյարդերի միջեւ փոխազդեցությունը:
Գիտնականները պարզել են, որ, նույնիսկ կոսմետիկ նպատակներով օգտագործվելու դեպքում բոտոկսը կարող է թափանցել կենտրոնական նյարդային համակարգ: Մասնագետները պնդում են, որ իրենց հետազոտությունը կարեւոր է նաեւ այն պատճառով, որ բոտոկսը նյարդային համակարգով տեղափոխվելու համար օգտագործում է նույն այն ճանապարհները, որոնցով տեղափոխվում են կատաղության եւ Արեւմտյան Նիլի վիրուսները: Բացահայտումը կարող է օգտագործվել այս հիվանդությունների զարգացման մեխանիզմների ուսումնասիրման համար:
Հետևեք NEWS.am Medicine-ին Facebook-ում և Twitter-ում