2015 թվականի առաջին կիսամյակում առողջապահության նախարարության «Թեժ գիծ» ծառայությունը ստացել է 7488 հեռախոսազանգ: Նախորդ տարվա նույն ժամանակահատվածի համեմատությամբ (5826) հեռախոսազանգերի թիվն աճել է գրեթե 22,2%-ով: Այս մասին NEWS.am Medicine-ին տեղեկացրել են Առողջապահության նախարարության մամլո ծառայությունից։
Նախորդ տարվա նույն ժամանակահատվածի համեմատ ավելացել են տեղեկատվական բնույթի հարցերը` 3064-ի փոխարեն 4345: Գրանցված ընդհանուր հեռախոսազանգերից բողոքները կազմել են 2.1%, իսկ 2014-ին՝ 4,9%:
Այս տարի արձանագրվել է օձի խայթոցի 39 դեպք, իսկ 2014 թվականի նույն ժամանակահատվածում` 33: Սոցփաթեթի առողջապահական բաղադրիչի վերաբերյալ արձանագրվել է 843 հեռախոսազանգ, շնորհակալական` 38:
Առաջին կիսամյակում ստացված բողոքների կապակցությամբ հարուցվել է 5 վարչական վարույթ, 7 անձ ենթարկվել է կարգապահական տույժի, 2-ն ազատվել է աշխատանքից: Մեկ բուժաշխատող ենթարկվել է վարչական պատասխանատվության` տուգանքի:
Մամլո ծառայության փոխանցմամբ՝ քաղաքացիների կողմից բարձրացված հարցերն ուսումնասիրվել եւ քննարկվել են, տրվել սպառիչ պատասխաններ եւ ստացել համապատասխան լուծումներ: Խնդրահարույց դեպքերի առնչությամբ տրվել են լրացուցիչ հանձնարարականներ և համապատասխան լուծումներ:
Հետևեք NEWS.am Medicine-ին Facebook-ում և Twitter-ում