Ցանկացած պատվաստանյութ մի շարք ցուցումներ ու հակացուցումներ ունի, եւ սեզոնային գրիպի դեմ պատվաստանյութը բացառություն չէ: Այն մասին, թե ում եւ որ դեպքերում չի կարելի գրիպի դեմ պատվաստում անել, մեզ պատմեց ՀՀ Առողջապահության նախարարության իմունոկանխարգելման ծրագրի ղեկավար Գայանե Սահակյանը:
Սեզոնային գրիպի դեմ պատվաստանյութերի հակացուցումները, մասնագետի խոսքով, կարելի է երկու խմբի կիսել՝ ստանդարտ եւ առանձնահատուկ:
Ստանդարտ հակացուցումները բնորոշ են բոլոր պատվաստանյութերին: Դրանք են.
Սուր վիճակ. ցանկացած հիվանդության սուր վիճակը: Եթե հիվանդը նման վիճակում է, պետք է սպասել, մինչեւ նա ապաքինվի ու միայն դրանից հետո մտածել պատվաստման մասին: Չարորակ նորագոյացություններ: Չարորակ նորագոյացությունների առկայության դեպքում պատվաստում սովորաբար չի արվում:Ինչ վերաբերում է առանձնահատուկ հակացուցումներին, ապա գրիպի դեմ պատվաստանյութի դեպքում ընդամենը մեկ նման հակացուցում կա՝ եթե մարդն ալերգիա ունի ձվի սպիտակուցի նկատմամբ, ապա նրան խորհուրդ չի տրվում գրիպի դեմ պատվաստում անել:
Պատճառն այն տեխնոլոգիան է, որն օգտագործվում է պատվաստանյութ ստեղծելու ժամանակ: Ինչպես բացատրեց Գայանե Սահակյանը, գրիպի դեմ պատվաստանյութը պարունակում է վիրուսի մասնիկներ, այլ ոչ թե ամբողջ վիրուսը: Այդ մասնիկները ստանալու համար գիտնականները վիրուսն աճեցնում են հավի սաղմի մեջ, որից հետո մշակում են այն ու մասնիկներ վերցնում պատվաստանյութ ստեղծելու համար: Այսպիսով, պատվաստանյութի մեջ մնում են նաեւ այն միջավայրի մասնիկները, որում աճեցրել են վիրուսը, դրա համար էլ այն հակացուցված է այն մարդուն, ով տվյալ միջավայրի նկատմամբ ալերգիա ունի:
Հետևեք NEWS.am Medicine-ին Facebook-ում և Twitter-ում