Մեր ափսեներում, հատկապես վերամշակված սննդին մի քանի գրամ չոր ջրիմուռ ավելացնելը կարող է թեթեւացնել սիրտ-անոթային համակարգի ծանրաբեռնվածությունը: Այդ մասին ասվում է Phycologia ամսագրի նոր հրապարակման մեջ, որում ներկայացված է Հարավային Դանիայի գիտնականների աշխատանքի արդյունքը: Վերջիններս պարզել են, որ անոթների եւ սրտի հիվանդությունների կանխարգելման գործում ջրիմուռները ծայրաստիճան արդյունավետ են:
Դանիացի գիտնականները մասնավորապես այն եզրահանգմանն են եկել, որ սրտի համար պաշտպանական էֆեկտն ապահովվում է ամեն օր սոսկ 5–10 գրամ չոր ջրիմուռի օգտագործմամբ: Մասնագետները հատուկ ուշադրություն են հրավիրում վերամշակված սննդին, ինչպես օրինակ` սառեցված պիցցային, հոթ-դոգներին եւ ամեն տեսակ թխվածքներին ջրիմուռներ ավելացնելու կարեւորության վրա: Դա կօգնի նվազեցնել սիրտ-անոթային հիվանդությունների ռիսկը, համոզված են հետազոտության հեղինակները:
«Պիցցայի խմորում ալյուրի ընդամենը 5 տոկոսը ջրիմուռներով փոխարինելը խմորին չի խանգարի բարձրանալ», - ասել են գիտնականները:
Բժիշկները խորհուրդ են տվել մսային կերակուրներին եւս ջրիմուռներ ավելացնել: Մասնագետների խոսքով, դա հնարավորություն կտա մեծացնել սննդում ցանցենու եւ հակաօքսիդանտների մակարդակը, ինչը կնպաստի խոլեստերինի ավելի լավ կարգավորմանը եւ աթերոսկլերոզից ավելի հուսալի պաշտպանությանը:
Ջրիմուռները քիչ կալորիաներ են պարունակում, հարուստ են անփոխարինելի ամինաթթուներով, սննդային նրբաթելերով, միներալներով եւ վիտամիններով, ինչպես նաեւ կիսաչհագեցած ճարպային թթուներով:
Հետևեք NEWS.am Medicine-ին Facebook-ում և Twitter-ում