Շատ մարդկանց համար Նոր տարվա տոնակատարությունը առաջվա պես նույնանում է հարուստ սեղանի եւ շատակերության հետ, ինչը կարող է բավականին տհաճ հետեւանքների հանգեցնել: Ինչպես կարելի է խուսափել տոնի ընթացքում շատակերությունից: Ահա թե ինչ խորհուրդներ է տվել Հասմիկ Աբովյանը:
Մասնագետի կարծիքով ամենակարեւորը մինչեւ Նոր տարվա տոնը քաղցած չմնալն է` ոչ մի քանի ժամով, ոչ մի քանի օրով: Որոշ մարդիկ, որոնք զբաղված են ամանորյա պատրաստություններով, մոռանում են ինչպես հարկն է սնվել կամ էլ գիտակցաբար չեն ուտում` իրենց ախորժակը պահելով Նոր տարվա սեղանի համար: Սակայն մասնագետի կարծիքով սխալ է այդպես անելը, որովհետեւ մինչեւ տոնը քաղցած մնացած մարդը, Նոր տարվա սեղան նստելով, չափից շատ կուտի ` ոչ միայն նրա համար, որ շատ քաղցած կլինի, այլեւ Նոր Տարվա նախապատրաստության հետ կապված սթրեսների պատճառով (ամենայն հավանականությամբ նա սնունդը կընկալի որպես այդ սթրեսի դեմ պայքարելու միջոց):
Ինչպես նշեց դիետոլոգը, որոշ մարդիկ նույնիսկ հատուկ փորձում են նիհարել մինչեւ Նոր Տարին, որովհետեւ գիտեն, որ տոնի ընթացքում կսկսեն շատ ուտել ու դարձյալ կգիրանան: Այդպես անելը եւս անցանկալի է, չէ՞ որ քաշի այդ բոլոր ցատկերը, շատակերությունը օրգանիզմի համար մեծ եւ լրիվ ավելորդ բեռ են:
Քաղցել չարժե նույնիսկ դեկտեմբերի 31-ին. եթե օրվա ընթացքում նորմալ սնվեք, երեկոյան շատ քաղցած չեք լինի: Ամենայն հավանականությամբ կկարողանաք ամանորյա սեղանի մոտ եւս չափավոր սնվել եւ չափից շատ չեք ուտի:
Ոչ պակաս կարեւոր է նաեւ տարվա ընթացքում իրեն չզրկել սիրելի մթերքից. եթե շատ եք սիրում այս կամ այն ուտեստը, ջանացեք դրանք պատրաստել ոչ միայն տոնի ժամանակ, այլեւ ամբողջ տարվա ընթացքում: Այդ դեպքում Նոր տարվա սեղանի մոտ չեք «նետվի» սիրելի ուտեստի վրա:
Հետևեք NEWS.am Medicine-ին Facebook-ում և Twitter-ում