Աղջիկն ատամների սպիտակեցումից հետո երրորդ աստիճանի այրվածքներ է ստացել (ֆոտո)

15 հունիսի, 2016 23:22

Ատամների սպիտակեցման սովորական պրոցեդուրան 18-ամյա Էբբի Քիլբրայդի համար իսկական մղձավանջով է ավարտվել: Նրա դեմքին երրորդ աստիճանի այրվածքներ են առաջացել:

Մեծ Բրիտանիայի երիտասարդ բնակչուհին որոշել է բրեկետների հեռացումը նշել ատամների սպիտակեցման պրոցեդուրայով: Աղջիկը երազում էր «նոր Քայլի Ջեններ» դառնալ եւ ընկերուհիների առաջ գլուխ գովել հոլիվուդյան ժպիտով, սակայն բախվել է թերապիային ծանրագույն հակազդեցության:

Հաջորդ առավոտ նա արթնացել է այնպիսի զգացողությամբ, ասես լնդերը մասնատվելու են: Պարզվել է, որ դրանք մեծապես այտուցվել են եւ ծածկվել արյունոտ փուչիկներով: Նրա օրգանիզմն այդպես էր արձագանքել այն գելին, որն օգտագործվել էր սպիտակեցման պրոցեդուրայի ընթացքում:

Facebook-ում իր գրառման մեջ աղջիկը լուսանկարների մի ամբողջ շարք է ներկայացրել, թե ինչի է հանգեցրել ատամների սպիտակեցումը: «Ես ընդամենը ուզում եմ գրել, թե ինձ ինչ է պատահել վերջին մի քանի օրվա ընթացքում, որպեսզի մյուսները նման սխալ չանեն», - պատմել է նա:

Էբբին պատմել է, որ ատամների սպիտակեցման համար ինքը դիմել է իր ծանոթ կնոջ, որը տանը նման ծառայություններ էր մատուցում: Պրոցեդուրան մեկ ժամ է տեւել եւ ամեն 10-15 րոպեն մեկ կինը սպիտակեցնող գել է քսել: Միաժամանակ նա աղջկանից չի հարցրել, թե արդյոք նա ալերգիա ունի, ինչպես եւ հատուկ թեստ չի անցկացրել: Պրոցեդուրայի ավարտից հետո Էբբիի ամբողջ բերանը համրացել է, իսկ շրթունքներն ուռել են, բայց կինը հայտնել է, թե դա նորմալ է: Նա աղջկան խորհուրդ է տվել շրթներկ օգտագործել պրոցեդուրայի հետքերը թաքցնելու համար:

Վատագույնը սկսվել է հաջորդ օրը, երբ ալերգիկ հակազդեցությունն ավելի ուժգնորեն է զարգացել: Ընդհանուր բժիշկը Էբբիին հայտնել է, որ նա մեծ հիմարություն է թույլ տվել եւ աղջկա համար դա պետք է դաս լինի մինչեւ կյանքի վերջ: Նա նրան հակագիստամիններ է նշանակել, որոնք նրան չեն օգնել:

Էբբիին զննել է երեք տարբեր ատամնաբույժ, որոնք նրա մոտ երրորդ աստիճանի այրվածքներ են ախտորոշել: Աղջկան նոր դեղեր են նշանակել եւ սուպերով ու թերխաշ ձվով խիստ սննդակարգ: Միայն դրանից հետո է նրա վիճակը սկսել բարելավվել: