Օրական ընդամենը 10 րոպե տեւողությամբ խաղերը կօգնեն ամրապնդել երեխայի առողջությունը

Երեխաների համար խաղերը շատ կարեւոր են, ոչ միայն այն պատճառով, որ օգնում են ճանաչել շրջապատող աշխարհը եւ ծանր օրից հետո հանգստանալ: Պարզվում է` օրական ընդամենը 10 րոպե տեւողությամբ շարժում պահանջող խաղը բավական է սրտի կամ կաթվածի հիվանդությունների հետագա առաջացման հավանականությունը նվազեցնելու համար:

Գիտնականների խոսքով` բացօթյա խաղերը դրական են ազդում կարդիո-մետաբոլիկ պրոցեսների վրա: Սա հատկապես արդիական է գեր եւ արյան մեջ ինսուլինի բարձր մակարդակ ունեցող երեխաների համար:

Երեխաների առողջության վրա շարժում պահանջող խաղերի ազդեցության վերաբերյալ հետազոտությունը կատարել են Ուեյք Ֆորեսթ համալսարանի աշխատակիցները: Նրանք վերլուծել են 4-ից մինչեւ 18 տարեկան ավելի քան 11 հազար երեխաների տվյալները: Հաշվի են առնվել երեխաների ֆիզիկական ակտիվության մակարդակը եւ կարդիո-մետաբոլիկ այնպիսի մարկերները, ինչպիսին են գոտկատեղի շրջագիծը, արյան ճնշումը, «օգտակար» եւ «վնասակար» խոլեստերինի, եռագլիցերիդների, շաքարի եւ ինսուլինի մակարդակը:

Վերլուծությամբ մարկերների եւ ինտենսիվ ֆիզիկական ակտիվության միջեւ 32 զգալի կապ է հայտնաբերվել: Մասնավորապես` նման խաղերը թույլ են տվել նվազեցնել գոտկատեղի շրջագիծը եւ ինսուլինի ցուցանիշները: Կարեւորն այն է, որ դրական արդյունքի համար բավական է եղել օրական ակտիվ խաղերի ընդամենը 10 րոպե տեւողությունը:

Հետևեք NEWS.am Medicine-ին Facebook-ում և Twitter-ում