Սեզոնային գրիպի դեմ պատվաստման շնորհիվ ՌԴ–ում 3.5 անգամ կրճատվել են հիվանդության դեպքերը

Անցյալ տարի Ռուսաստանում հաջողվեց հասնել սեզոնային գրիպի դեմ պատվաստման առավելագույն ծավալների. պատվաստվել է 57 մլն մարդ՝ բնակչության 40 տոկոսը։ Դա թույլ տվեց 5 տարում 3.5 անգամ կրճատել գրիպով հիվանդանալու դեպքերը։ Այս մասին NEWS.am Medicine–ի հետ զրույցում ասել է ՌԴ առողջապահության նախարար Վերոնիկա Սկվորցովան։

Նրա խոսքով՝ սեզոնային գրիպի դեմ պատվաստման շնորհիվ մահացու ելքով դեպքերի եւ հիվանդության ծանր դեպքերի թիվը 20 անգամ պակասել է։ Այս տարի, ըստ նախարարի, պլանավորվում է ավելի շատ մարդկանց պատվաստել։ Պետությունն արդեն պատվաստանյութեր է գնել, ընդ որում, 10 անգամ ավելի շատ, քան անցյալ տարի։

Պատվաստանյութերի նկատմամբ վստահության մակարդակի բարձրացման համար բնակչության տարբեր խմբերի հետ բացատրական աշխատանքներ են տարվում։

«Մենք կոշտ արգելքների կողմնակիցն չենք, մենք կողմ ենք, որպեսզի տեղեկությունը հասցնենք ամեն մարդու, հիմնավորենք իմունային կանխարգելման անհրաժեշտությունը։ Բնակչությունն արդեն ավելի մեծ վստահություն է ցուցաբերում այս պատվաստանյութին, քանի որ արդյունքներն արդեն խոսուն են»,– նշեց նախարարը։

Նշենք, որ Վերոնիկա Սկվորցովան Հայաստան է եկել հայ–ռուսական 3–րդ առողջապահական համաժողովին մասնակցելու համար։

Հետևեք NEWS.am Medicine-ին Facebook-ում և Twitter-ում