Վերջերս Ռուսաստանում հայտնի է դարձել պլաստիկ վիրաբույժների պատճառով հիվանդների մահվան մի քանի դեպքերի մասին: Life.ru-ն հայտնում է վերջին 2 տարում պլաստիկ վիրաբուժության 6 զոհի մասին:
29-ամյա կին
Ապրիլի 25-ի գիշերը 29-ամյա կինը մահացել է Սկլիֆոսովսկու անվան գիտահետազոտական ինստիտուտի վերակենդանացման բաժանմունքում: Նրան այս հիվանդանոց բուժվելու էին բերել ապրիլի 12-ին Տրոիցկու փողոցում գտնվող Էսթետիկ վիրաբուժության, ստոմատոլոգիայի, կոսմետոլոգիայի եւ գինեկոլոգիայի բժշկական կենտրոնից:
Մասնավոր կլինիկայում նրան կատարել են կրկնակի ռինոսեպտոպլաստիկա, սակայն վիրահատության ժամանակ հիվանդի վիճակը կտրուկ վատթարացել է: Կնոջը Սկլիֆոսովսկու անվան գիտահետազոտական ինստիտուտ էին տեղափոխել «ատիպիկ հեմոլիտային-ուրեմիկ համախտանիշ» ախտորոշմամբ:
Եկատերինա Կիսելյովա
2018 թվականի ապրիլի 15-ին «Տրիումֆ պալաս» կլինիկայում կրծքի ձգման վիրահատության ժամանակ մահացել է 32-ամյա Եկատերինա Կիսելյովան: Ամբողջ ընտանիքը 2 երեխաների մորը համոզում էր վիրահատություն չկատարել, սակայն նա, միեւնույն է, պառկել է նորաձեւ պլաստիկ վիրաբույժ Գրիգորի Պերեկրեստովի նշտարի տակ: Վիրահատությունից հետո Եկատերինայի սրտի անսպասելի կանգ է գրանցվել, եւ կլինիկայի բժիշկները նրան ոչ մի բանով չեն կարողացել օգնել: Կնոջ մահվան փաստով քրեական գործ է հարուցվել:
Մանե Մարտիրոսյան
Բելգորոդի բնակիչ 24-ամյա Մանե Մարտիրոսյանը 2016 թվականի դեկտեմբերին մահացել է քթի շտկման անօրինական վիրահատությունից հետո: Աղջիկը վաղուց էր երազում արծվաքթից ազատվել եւ բժիշկ է գտել, ով համաձայնվել է վիրահատությունը կատարել՝ մարզային Մանկական կլինիկական հիվանդանոցի ԼՕՌ բաժանմունքի վարիչ Լեոնիդ Պաժինսկին: Փաստաթղթերի համաձայն՝ Մանեին պետք է կատարեին քթի միջնապատի ենթալորձաթաղանթային հատում, բժիշկը պլաստիկ վիրաբույժի դիպլոմ չուներ: Վիրահատության ժամանակ աղջկա ինքնազգացողությունն անսպասելի վատթարացել է, եւ նա մահացել է անաֆիլակտիկ շոկից:
Մարիա Դ.
Վոլգոգրադից 23-ամյա Մարիա Դ.-ն մահացել է շրթունքների եւ կզակի շտկման վիրահատության ժամանակ: Տեղային ցավազրկող ներարկելիս աղջկա մոտ ջղաձգություններ են սկսվել, եւ բժիշկը շտապ օգնություն է կանչել: Բժիշկները վերակենդանացման միջոցներ են ձեռնարկել, սակայն դա չի օգնել՝ Մարիան մահացել է վիրահատական սեղանի վրա: Աղջկա մասվան պատճառն է դարձել անաֆիլակտիկ շոկը:
Եկատերինա Կլեմենտեւա
Մագնիտոգորսկից 25-ամյա Ելենա Կլեմենտեւան երազում էր կուրծքը մեծացնելու մասին եւ հարազատներից գաղտնի փող էր հավաքում պլաստիկ վիրահատության համար: Երկրորդ իմպլանտը տեղադրելուց առաջ անեսթետիկը ներարկելիս Ելենայի մոտ անաֆիլակտիկ շոկ է առաջացել եւ սրտի կանգ: Վիրահատությունը սկսվել է ցերեկը ժամը 3-ին, իսկ երեկոյան 10-ին նա հայտնվել է քաղաքային հիվանդանոցի վերակենդանացման բաժանմունքում, որտեղ ավելի ուշ մահացել է: Մինչեւ հիմա հայտնի չէ, թե պլաստիկ վիրաբույժներն ինչու անմիջապես շտապ օգնություն չեն կանչել:
Անաստասիա Չաչինա
Մոսկվացի 28-ամյա Անաստասիա Չաչինան մոսկովյան «ԴեՎիտա» կլինիկայում մահացել է լիպոսակցիայի ժամանակ: Աղջկա մահվան պատճառն էր լիդոկաինի գերդոզավորումը՝ բժիշկները մի քանի անգամ գերազանցել էին թույլատրելի չափաքանակը: Ներարկումից անմիջապես հետո Անաստասիայի աչքերի բբերը վեր են բարձրացել, ջղաձգություններ են սկսվել եւ բերանից փրփուր է թափվել: Վիրահատությունն անցկացրած պլաստիկ վիրաբույժ Դենիս Ավերչենկովը դատապարտվել է 2 տարվա ազատազրկման:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր