Ինչո՞ւ է դեպրեսիայի ժամանակ սեւ շոկոլադ ուտելն օգտակար

Սեւ շոկոլադի սիրահարները ավելի քիչ են ենթակա դեպրեսիայի:

Լոնդոնի Համալսարանական քոլեջի մասնագետները հետազոտության շրջանակում 13 հազար մարդու շրջանում հարցում են անցկացրել շոկոլադի գործածման եւ դեպրեսիայի ախտանշանների առկայության վերաբերյալ: Պարզվել է, որ սեւ շոկոլադի սիրահարները հազվադեպ են հայտնել դեպրեսիայի որեւէ կլինիկական դրսեւորման մասին: Ուշագրավ է, որ նման պատկեր չի նկատվել կաթնային կամ սպիտակ շոկոլադ գործածողների շրջանում:

Մասնագետներն ուշադրություն են հրավիրում այն փաստի վրա, որ շոկոլադի մեջ պարունակվում են մի շարք հոգեակտիվ բաղադրիչներ, այդ թվում՝ անանդամինի նմանակներ, որոնք կանաբինոիդների նման էյֆորիա են առաջացնում: Դրանից բացի, շոկոլադի մեջ պարունակվում է ֆենիլէթիլամին, որի ածանցյալները համարվում են հոգեմետներ եւ խթանիչներ:

Հետաքրքիր մանրամասն. դեպրեսիայի ժամանակ մարդը շոկոլադ քիչ է գործածում, քանի որ նվազում է քաղցրի հանդեպ ձգտումը:

Հետազոտության արդյունքները հրապարակվել են Depression and Anxiety ամսագրում:

Հետևեք NEWS.am Medicine-ին Facebook-ում և Twitter-ում