Հոդաբորբի դեմ դեղամիջոցները կարող են պաշտպանել սրտային հիվանդություններից

Հոդաբորբի դեմ դեղամիջոցները կարող են պաշտպանել սրտային հիվանդություններից՝ պարզել են Լիդսի համալսարանի (Բրիտանիա) գիտնականները, որոնց հետազոտության արդյունքները հրապարակվել են Annals of the Rheumatic Diseases ամսագրում:

Ռեւմատոիդ հոդաբորբն առնվազն 2 անգամ մեծացնում է սրտանոթային հիվանդությունների զարգացման ռիսկը:

Գիտնականները պարզել են, որ հոդաբորբը զգալիորեն ուժգնացնում է անոթների կոշտությունը , ինչը կարող է համարվել սրտանոթային աղետների ցուցիչ: Հետազոտությունը ցույց է տվել, որ ռեւմատոիդ հոդաբորբի նույնիսկ ամենավաղ փուլերում նկատվում է անոթների բարձր կոշտություն նույնիսկ առանց սրտային հիվանդությունների ռիսկի գործոնների:

Մասնագետները ՄՌՏ-սքանավորում են անցկացրել ռեւմատոիդ հոդաբորբով 82 պացիենտի մոտ, որոնք սրտի հետ կապված խնդիր չեն ունեցել: Սքանավորումը հայտնաբերել է խոշոր հոդերի էլաստիկության կորուստ, ինչպես նաեւ սրտի սպիի նախանշաններ ու փոփոխություններ ձախ փորոքի պատում:

Կրկնակի սքանավորում է անցկացվել մեկ տարի անց, որի ընթացքում պացիենտները բուժման կուրս են անցել՝ ռեւմատոիդ հոդաբորբի դեմ դեղամիջոցներ ընդունելով: Արդյունքները խոստումնալից են եղել. հոդաբորբի դեմ դեղամիջոցները, ինչպես պարզվել է, կարող են խոչընդոտել սրտային հիվանդությունների զարգացմանը:

Գիտնականների խոսքով՝ ռեւմատոիդ հոդաբորբի դեպքում բուժումը պետք է սկսել որքան հնարավոր է շուտ, որպեսզի նվազեցվի սրտանոթային հիվանդությունների զարգացման ռիսկը:

Հետևեք NEWS.am Medicine-ին Facebook-ում և Twitter-ում