Մեկ կիլոգրամից պակաս մարմնի քաշով ծնված տղամարդիկ կենսաբանորեն 4,6 տարով ավելի մեծ են, քան սովորական քաշով ծնված նույն տարիքի տղամարդիկ: Նման եզրակացության են հանգել Մակմաստերի համալսարանի գիտնականները:
CTV News-ի փոխանցմամբ՝ մասնագետները սա պարզաբանում են ֆիզիոլոգիական սթրեսով, որը ազդում է երեխայի վրա մոր արգանդում, իսկ ծնվելուց հետո՝ ինտենսիվ թերապիայի բաժանմունքում:
Գիտնականները հետազոտել են ծայրահեղ ցածր քաշով նորածինների եւ նորմալ քաշ ունեցող նորածինների խմբերի: Օգտագործելով էպիգենետիկ ժամացույց՝ տարիքը չափելու կենսաքիմիական թեստ, նրանք հետազոտել են վաղաժամ ծնված 45 տղամարդու եւ նորմալ քաշով ծնված 47 տղամարդու գեները, երբ նրանք եղել են 30-35 տարեկան:
Ինչպես պարզվել է, վաղաժամ ծնված տղամարդիկ ավելի արագ են ծերանում՝ միջինը ավելի քան 4 տարով մեծ են նրանցից, ովքեր ճիշտ ժամանակին են ծնվել: Հետաքրքրական է, որ հետազոտվող կանանց խմբերի կենսաբանական տարիքի մեջ որեւէ տարբերություն չի հայտնաբերվել: Գիտնականների կարծիքով՝ սա կարելի է բացատրել այն փաստով, որ իգական սեռի ներկայացուցիչները ավելի լավ են դիմադրում սթրեսին:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր