Ամեն տարի միլիոնավոր երիտասարդներ դառնում են ծխախոտի արդյունաբերության զոհ. ԱՀԿ

Առողջապահության համաշխարհային կազմակերպությունը (ԱՀԿ) կոչ է արել երեխաներին պաշտպանել ծխախոտի արդյունաբերությունից, որը ձգտում է ավելացնել իր արտադրանքի սպառողների թիվը: Ժնևում հրապարակված զեկույցում ԱՀԿ-ն նշում է, որ ամեն տարի միլիոնավոր երիտասարդներ դառնում են ծխախոտ արտադրողների «մանիպուլյատիվ մարտավարության» զոհը։

«Ամբողջ աշխարհում 13-15 տարեկան մոտ 37 միլիոն երեխա ծխախոտ է օգտագործում։ Շատ երկրներում դեռահասների շրջանում էլեկտրոնային ծխախոտի օգտագործման մակարդակը գերազանցում է մեծահասակների ցուցանիշը: ԱՀԿ եվրոպական տարածաշրջանում հարցված 15-ամյա երիտասարդների 20%-ը հայտնել է, որ վերջին 30 օրվա ընթացքում օգտագործել է էլեկտրոնային ծխախոտ»,- նշել է կազմակերպությունը։

«Ամեն տարի միլիոնավոր երիտասարդներ դառնում են ծխախոտի արդյունաբերության մանիպուլյատիվ մարտավարության զոհը», - Ժնևում կայացած մամուլի ասուլիսում ասաց ԱՀԿ-ի առողջության խթանման բաժնի տնօրեն Ռուդիգեր Կրեխը: «Այս արդյունաբերությունը օգտագործում է թվային և սոցիալական մեդիա, առաքման հավելվածներ և այլ նորարարական ուղիներ՝ մեր երեխաներին հասնելու համար», - ասաց նա՝ հավելելով, որ այն նաև օգտագործում է «հին հնարքներ, ինչպիսին է անվճար նմուշներ տալը հաճախորդների նոր սերնդին գրավելու համար»: Բացի այդ, ծխախոտի և հարակից արդյունաբերությունները «օգտագործում են երեխաների համար նախատեսված համեր, ինչպիսիք են բամբակյա կոնֆետը և մաստակը՝ երիտասարդ սպառողներին գրավելու համար»: Ըստ ԱՄՆ հետազոտության՝ «երիտասարդ էլեկտրոնային ծխախոտ օգտագործողների ավելի քան 70%-ը կթողներ ծխելը, եթե այդ ապրանքները հասանելի լինեին միայն ծխախոտի համով»։

Որոշ դեպքերում մանրածախ վաճառողները «առաջարկում են էլեկտրոնային ծխախոտների ավելի քան 16,000 համային տեսականի», շատ ապրանքներ ունեն «նրբագեղ և գունագեղ դիզայն, որոնք գրավում են երեխաներին և դեռահասներին», - ասաց Կրեխը: Թեև այս ամենը «ագրեսիվ կերպով վաճառվում է երիտասարդներին», ծխախոտի արդյունաբերությունը «շարունակում է պնդել, որ այդ ապրանքները նախատեսված են մեծահասակների համար»։ Սակայն, նրանց նպատակը պարզ է. նրանք ձգտում են փոխարինել մահացած և հիվանդ ծխախոտ օգտագործողներին և, հետևաբար, ներգրավել «կախվածության մեջ հայտնված նոր օգտվողներին»։

Ինչպես ընդգծել է ԱՀԿ-ի դեպարտամենտի տնօրենը, այս իրավիճակում չի կարելի անտարբեր «կողքին կանգնել և հետևել»։ Կառավարությունները պետք է «պաշտպանեն ներկա և ապագա սերունդներին»՝ ձեռնարկելով «ուժեղ գործողություններ՝ համաձայն ԱՀԿ-ի ծխախոտի դեմ պայքարի շրջանակային կոնվենցիայի»։ Այս միջոցները ներառում են ծխախոտի գովազդի և հոլդինգային ընկերությունների, շուկայավարների և լրատվամիջոցների համապարփակ արգելք, որոնք պատասխանատու են արգելքը խախտելու համար, ծխախոտի հարկերի բարձրացում և անչափահասներին դրա վաճառքի արգելում:

Հետևեք NEWS.am Medicine-ին Facebook-ում և Twitter-ում