Կետո-դիետան մարզումների հետ համադրությամբ բարելավում է նյութափոխանակությունը. NatCom

Ամերիկացի գիտնականներն ապացուցել են, որ խիստ կետոգեն դիետան՝ բարձր ճարպային եւ ցածր ածխաջրային պարունակությամբ, կարող է կարգավորել արյան մեջ շաքարի մակարդակը եւ բարելավել մկանների գործառույթը՝ գոնե մկների մոտ։ Ազդեցությունը հատկապես ցայտուն էր, երբ դիետան համակցվում էր վարժությունների հետ։ Ուսումնասիրությունը հրապարակվել է Nature Communications (NatCom) ամսագրում։

Հետազոտությունն անցկացվել է ԱՄՆ մի քանի հետազոտական ​​կենտրոնների գիտնականների խմբի կողմից։ Փորձում օգտագործվել են հիպերգլիկեմիա՝ արյան մեջ շաքարի բարձր մակարդակ ունեցող մկներ։ Կետոգեն դիետային անցնելուց ընդամենը մեկ շաբաթ անց նրանց գլյուկոզայի մակարդակը նորմալացել է։

«Կետոգեն դիետայից մեկ շաբաթ անց կենդանիների արյան մեջ շաքարի մակարդակը նույնքան լավ էր, որքան եթե նրանք դիաբետ չունենային»,- ասել է Virginia Tech Carilion-ի ֆիզիոլոգ Սառա Լեսարդը։

Ութ շաբաթ անց գիտնականներն ավելացրել են վարժությունները։ Պարզվել է, որ վարժություններն ուժեղացրել են դիետայի ազդեցությունը. կենդանիների աերոբիկ դիմացկունությունը մեծացել է, նրանց մկաններն ավելի լավ են մատակարարվել թթվածնով, նրանք ավելի դանդաղ են հոգնել։

Հետազոտողների կարծիքով, կետոզը՝ վիճակ, որի դեպքում մարմինը սկսում է ճարպը որպես հիմնական էներգիայի աղբյուր օգտագործել ածխաջրերի փոխարեն, ոչ միայն ուղեկցում է այս փոփոխություններին, այլեւ ակտիվորեն ազդում է մկանների եւ անոթների ֆունկցիայի վրա։

Ավելի վաղ նույն հետազոտական ​​​​խումբը ցույց էր տվել, որ հիպերգլիկեմիան խաթարում է մարմնի ֆիզիկական ծանրաբեռնվածությանը հարմարվելու ունակությունը։ Նոր հետազոտությունը հաստատել է, որ կետոգեն դիետան կարող է մասամբ փոխհատուցել այդ ազդեցությունը։

Սակայն հետազոտությունն ունի կարեւոր սահմանափակումներ։ Բոլոր փորձերը կատարվել են կենդանիների, այլ ոչ թե մարդկանց վրա։ Բացի այդ, չնայած ֆիզիոլոգիական պարամետրերի բարելավմանը, մկների իրական մարզական արդյունավետությունը չի բարելավվել, հավանաբար ածխաջրերի անբավարարության պատճառով։ Երբ ածխաջրերը կրկին ներմուծվել են սննդակարգ, դիմացկունության ցուցանիշները բարելավվել են։

Հեղինակներն ընդգծել են, որ կետո-դիետան բոլորի համար միատեսակ լուծում չէ։ Դրան դժվար է հետեւել եւ կարող է բոլորին հարմար չլինել։ Այլընտրանքային մոտեցումները, ինչպիսին է միջերկրածովյան դիետան, նույնպես կարող են իջեցնել արյան մեջ շաքարի մակարդակը։

Այնուամենայնիվ, հետազոտությունը ցույց է տվել, որ դիետան եւ ֆիզիկական ակտիվությունը առանձին չեն գործում, ընդհակառակը, ուժեղացնում են միմյանց ազդեցությունը։ Ապագայում գիտնականները նախատեսում են կլինիկական փորձարկումներ անցկացնել մարդկանց վրա՝ ստուգելու համար, թե արդյոք դիտարկված ազդեցությունը պահպանվում է։

Հետևեք NEWS.am Medicine-ին Facebook-ում և Twitter-ում