Անապատի ըմպելիք. ինչպե՞ս կարող է ուղտի կաթը օգնել օրգանիզմին

Food Science & Nutrition ամսագրում հրապարակված գիտական տվյալների վերջերս կատարված վերանայումը լույս է սփռում մարդու առողջության վրա ուղտի կաթի ունեցած ազդեցության վրա՝ ընդգծելով ինչպես պոտենցիալ առավելությունները, այնպես էլ կարևոր զգուշացումները:

Հետազոտողները վերլուծել են ուղտի կաթի բաղադրության և առողջության տարբեր ասպեկտների վրա դրա ազդեցության վերաբերյալ առկա ուսումնասիրությունները, որպեսզի գնահատեն, թե որքանով են հիմնավորված դրա օգտակարության մասին պնդումները և ինչ ռիսկեր կարող են կապված լինել դրա օգտագործման հետ:

Ուղտի կաթը ավանդաբար օգտագործվում է Մերձավոր Արևելքի, Հյուսիսային Աֆրիկայի և Կենտրոնական Ասիայի երկրներում, որտեղ այն պատմականորեն դիտարկվել է որպես սննդարար մթերք, հատկապես անապատային կլիմայական պայմաններում:

Այն պարունակում է սպիտակուցներ, վիտամիններ, հանքանյութեր և հատուկ կենսաբանական ակտիվ միացություններ, որոնք այն տարբերում են կովի կաթից: Ակնարկը ցույց է տալիս, որ այս տարբերությունները կարող են նշանակալի հետևանքներ ունենալ առողջության համար: Մասնավորապես, առանձին հետազոտություններ ուղտի կաթի օգտագործումը կապում են դիաբետ ունեցող մարդկանց արյան մեջ շաքարի հավասարակշռության բարելավման, ինչպես նաև արյան լիպիդային կազմի դրական փոփոխությունների հետ: Որոշ տվյալներ նույնպես մատնանշում են, որ ուղտի կաթի կանոնավոր օգտագործումը կարող է ամրապնդել իմունային գործառույթը և նվազեցնել բորբոքային գործընթացները:

Միևնույն ժամանակ, ակնարկի հեղինակները ընդգծում են, որ հայտարարված մի շարք առավելություններ դեռևս բավարար չափով հաստատված չեն լայնածավալ կլինիկական փորձարկումներով, և գիտական հանրության շրջանում դեռևս չկա վերջնական կոնսենսուս: Հասանելի հետազոտություններից շատերն ունեն սահմանափակումներ, օրինակ՝ մասնակիցների փոքր ընտրանքը կամ ստուգիչ խմբերի բացակայությունը, ինչը դժվարացնում է միանշանակ հանձնարարականները:

Ակնարկում առանձնահատուկ ուշադրություն է դարձվել հում վիճակում ուղտի կաթի օգտագործման անվտանգությանը: Գիտնականները զգուշացնում են, որ չստերիլացված կաթը կարող է պարունակել միկրոօրգանիզմներ, որոնք ընդունակ են առաջացնել վարակներ կամ սննդային թունավորումներ, հատկապես թույլ իմունիտետ ունեցող մարդկանց, երեխաների և տարեցների շրջանում:

Այդ իսկ պատճառով, ըստ փորձագետների, ուղտի կաթ օգտագործելիս պետք է նախապատվությունը տալ պաստերիզացված արտադրանքին կամ պահպանել մշակման այնպիսի միջոցներ, որոնք նվազագույնի են հասցնում ռիսկերը:

Ակնարկի հեղինակները նաև նշում են, որ ուղտի կաթը կարող է հետաքրքիր օբյեկտ դառնալ հետագա հետազոտությունների համար, հատկապես նյութափոխանակության հիվանդությունների և իմունաբանության ոլորտներում։ Այդուհանդերձ, նրանք ընդգծում են ավելի մասշտաբային և խիստ կլինիկական փորձարկումների անցկացման անհրաժեշտությունը՝ նկատվող ազդեցությունները հաստատելու կամ հերքելու համար:

Ի վերջո, գիտնականները գալիս են այն եզրակացության, որ ուղտի կաթն իսկապես օժտված է առողջության համար մի շարք պոտենցիալ առավելություններով։ Սակայն, նախքան այն որպես «հրաշագործ» մթերք դիտարկելը, կարևոր է հաշվի առնել ինչպես առկա ապացույցների որակը, այնպես էլ անվտանգության ասպեկտները:

Հետևեք NEWS.am Medicine-ին Facebook-ում և Twitter-ում