Եգիպտոսում սխալմամբ հեռացրել են բրիտանացի զբոսաշրջիկի կույր աղիքը

Մեծ Բրիտանիայի 29-ամյա բնակչուհին պնդում է, որ Եգիպտոսում հանգստի ժամանակ սխալ ախտորոշման պատճառով անհիմն հեռացրել են նրա կույր աղիքը։ Այս մասին հայտնում է «Daily Mail»-ը։

Դևոն կոմսության Փեյնթոն քաղաքի բնակչուհի Սիան Իրվինգն իր զուգընկերոջ՝ Ջեկ Ջեկսոնի հետ մեկնել էր Շարմ էշ Շեյխ՝ վերջինիս ծննդյան տարեդարձը նշելու համար։ Ճամփորդությունը նախատեսված է եղել տասն օրվա համար, սակայն հանգստի կեսերին կնոջ որովայնում հանկարծակի ուժեղ ցավեր են սկսվել, նա անդադար փսխել է, իսկ մարմնի ջերմաստիճանը բարձրացել է մինչև 41°C։

Իրվինգի խոսքով՝ տեղի բժիշկները սկզբում կասկածել են, որ նրա մոտ ապենդիցիտ է (կույր աղիքի բորբոքում)։ Հետազոտությունից հետո, որն այդպես էլ չի պարզել վատթարացման հստակ պատճառը, որոշում է կայացվել վիրահատել և հեռացնել կույր աղիքը։ Սակայն վիրահատությունը թեթևացում չի բերել, և ախտանիշները պահպանվել են։

Հիվանդանոցում մի քանի օր անցկացնելուց հետո կնոջը թույլատրել են վերադառնալ Մեծ Բրիտանիա։ Այնտեղ նրան անմիջապես հոսպիտալացրել են Էքսետեր քաղաքի հիվանդանոցում՝ հետագա հետազոտման և բուժման համար։

Իրվինգը պատմում է, որ բրիտանացի բժիշկները եկել են այն եզրակացության, որ կույր աղիքի հեռացման անհրաժեշտություն, ամենայն հավանականությամբ, չի եղել։ Ըստ նրանց՝ առողջական վիճակի կտրուկ վատթարացման պատճառը, ամենայն հավանականությամբ, սննդային թունավորումն է եղել։ Ավելի ուշ կնոջ մոտ ախտորոշվել է «կոլիտ»՝ հաստ աղիքի բորբոքային հիվանդություն։

Այս հիվանդությունը լրջորեն անդրադարձել է նրա առողջության և կյանքի որակի վրա։ Կինը հայտնում է, որ մինչ օրս ունի մարսողական խնդիրներ, քաշի զգալի կորուստ, քրոնիկ հոգնածություն և որոշ մթերքների, այդ թվում՝ կաթնամթերքի ու գլյուտենի նկատմամբ անտանելիություն։

Իրվինգի խոսքով՝ դեպքից անցել է գրեթե մեկ տարի, սակայն ինքը դեռ զգում է հիվանդության հետևանքները։ Բացի այդ, վիրահատությունից հետո մնացել է մշտական սպի, ինչն իր համար նաև հոգեբանական մեծ սթրես է դարձել։

Հիշելով պատահածը՝ բրիտանուհին ասում է, որ ուղևորությունը, որը պետք է միայն հաճելի հիշողություններ թողներ, ի վերջո ընդմիշտ փոխել է իր կյանքը։

Հոդվածի հրապարակման պահին Շարմ էշ Շեյխի միջազգային հիվանդանոցը չի պատասխանել լրագրողների հարցումներին և մեկնաբանություն չի տվել։

Հետևեք NEWS.am Medicine-ին Facebook-ում և Twitter-ում