Նուշն օգնում է նվազեցնել «վատ» խոլեստերինի մակարդակը. Frontiers

Նուշի կանոնավոր օգտագործումը կարող է օգնել նվազեցնել «վատ» խոլեստերինի մակարդակը, նվազեցնել բորբոքումը և վերահսկել մարմնի զանգվածը: Նման  եզրակացության են հանգել Սաուդյան Արաբիայի Կասիմի համալսարանի հետազոտողները: Աշխատանքը հրապարակվել է Frontiers in Nutrition հանդեսում:

Գիտնականները վերլուծել են ութ համակարգային ակնարկ՝ պատահականացված հետազոտությունների մեատանլիզներով, որոնցում ուսումնասիրվել է նուշի ազդեցությունը չափահասների առողջության վրա: Ընկույզի կանոնավոր ներառումը սննդակարգում կապված է եղել ընդհանուր խոլեստերինի և ցածր խտության լիպոպրոտեինների՝ այսպես կոչված «վատ» խոլեստերինի մակարդակների նվազման հետ, որի ավելցուկը բարձրացնում է սրտանոթային հիվանդությունների ռիսկը:

«Մարմնի զանգվածի վրա ազդեցությունն ավելի նկատելի է եղել այն հետազոտություններում, որտեղ մասնակիցներն օրական կերել են առնվազն 50 գրամ նուշ՝ առնվազն 12 շաբաթվա ընթացքում: Նրանց մոտ նվազել են մարմնի զանգվածը, գոտկատեղի շրջագիծը և ճարպային հյուսվածքի քանակը: Բացի դրանից, մասնակիցները հայտնել են սովի ավելի փոքր զգացման մասին»,- նշել են գիտնականները:

Հետազոտողները հայտնաբերել են նաև բորբոքման և օքսիդատիվ սթրեսի որոշ ցուցանիշների բարելավումներ. վերջինս այն գործընթացն է, որի ժամանակ ակտիվ մոլեկուլների ավելցուկը կարող է վնասել բջիջները: Մասնավորապես, նուշ սիրողների մոտ նվազել է C-ռեակտիվ սպիտակուցի մակարդակը, որն օգտագործվում է օրգանիզմում բորբոքումը գնահատելու համար:

Նախորդ հետազոտությունները ցույց են տվել, որ նուշը պարունակում է ֆիտոստերոլներ, մասնավորապես՝ β-սիտոստերոլ: Դրանք կարող են մրցել խոլեստերինի հետ՝ աղիներում ներծծման համար: Ընկույզի կազմում առկա չհագեցած ճարպաթթուները նույնպես օգնում են բարելավել լիպիդային պրոֆիլը:

Հեղինակները կարծում են, որ նուշը ի վիճակի է լինել սննդակարգի օգտակար մաս՝ սրտի և նյութափոխանակության առողջությունը պահպանելու համար: Սակայն արդյունքները չեն նշանակում, որ ընկույզներն ինքնին կանխում են հիվանդությունները կամ երաշխավորում քաշի նվազում. ազդեցությունը կախված է ընդհանուր սնուցումից և ապրելակերպից:

Հետևեք NEWS.am Medicine-ին Facebook-ում և Twitter-ում