Էկզեման մաշկային բորբոքում է, որը հատկապես այն ընտանիքներում է լինում, որոնք ասթմայի, ցանային տենդի կամ այլ ալերգիաների պատմություն ունեն: Հիվանդությունն ամբողջ կյանքի ընթացքում կարող է կրկնվել, իսկ չոր եւ զգայուն մաշկը միշտ կարող է անհանգստացնել:

Մասնագետների խոսքով 2 տարեկանից փոքր երեխաների 30 տոկոսը հակված է ատոպիկ դերմատիտ կամ էկզեմա ունենալուն:

Էկզեմա՞, թե՞ պարզապես չոր մաշկ

Բժիշկները նախազգուշացնում են՝ էկզեման կարող է սկսվել չոր մաշկից, բայց այն ավելին է, քան չոր մաշկը: Էկզեմայի դեպքում մաշկը կարմրում է, մաշկի վրա քոր առաջացնող ցան է հայտնվում, որը ձեռք տալու կամ քորելու դեպքում կարող է ավելի կարմրել եւ ավելի շատ քոր առաջացնել: Հաճախ բշտիկները կարող են վնասվել, արնահոսել եւ ավելի շատ տարածվել:

Էկզեման տարիքին զուգընթաց իր տեղը փոխում է

• Էկզեման կարող է մարմնի ցանկացած հատվածում հայտնվել, սակայն տարբեր տարիքում այն մարմնի տարբեր հատվածներում է առաջանում: Այսպես՝

• Մանկահասակների դեմքին եւ գլխին

• Առաջին քայլերն անող երեխաների ձեռքերին եւ ոտքերին

• Դեռահասների եւ մեծահասակների արմունկներին, դաստակներին, ձեռքի ծալքերում, ծնկներին, ոտքի կոճերին, ոտքերին եւ պարանոցին:

Միջավայրի գործոնները եւս նպաստում են էկզեմայի առաջացմանը

Բացի չոր մաշկից, միջավայրի գործոնները նույնպես կարող են նպաստել հիվանդության առաջացմանը՝

• Ալերգենները, օրինակ՝ ծաղկափոշին եւ տնային կենդանիները

• Մաշկային գրգռիչները, օրինակ՝ լվացքի փոշիները, ներկերը, անուշահոտ եւ այլ քիմիական նյութերը

• Գործվածքները

• Ջերմությունը եւ քրտինքը

• Սթրեսը