ԳՄՕ պարունակող մթերքները կարող են վնասակար լինել առողջության համար. հասարակական գործիչ

Գենետիկորեն մոդիֆիկացված մթերքներն առաջին հայացքից մի շարք առավելություններ ունեն օրգանական մթերքների նկատմամբ, սակայն դրանք կարող են վնասակար լինել մեր առողջության համար, նշում է էկոլոգ եւ հասարակական գործիչ Կարինե Դանիելյանը:

Նրա խոսքով՝ շատերը պնդում են, որ ԳՄՕ-ն կարող է փրկել մարդկությանը սովամահ լինելուց, սակայն հաշվարկել բոլոր հնարավոր ռիսկերն այս պահին հնարավոր չէ, այդ պատճառով որպես սնունդ օգտագործել այդ մթերքները առայժմ վաղ է:

Ինչպես նշեց Կարինե Դանիելյանը, գենետիկական մոդիֆիկացիայի դեպքում այս կամ այն օրգանիզմի գենոտիպը կարող է փոփոխվել գենային ինժեներիայի տարբեր մեթոդների շնորհիվ: Օրինակ՝ կարելի է որեւէ բույսին փոխպատվաստել ձկան գեները եւ այդպես այն դարձնել ցրտադիմացկուն:

Իսկ պարզել, ինչպես է ԳՄՕ-ն ազդում մարդու առողջության վրա, այս պահին հնարավոր չէ, դրա համար մի քանի սերունդ է անհրաժեշտ: Սակայն, հասարակական գործչի խոսքով՝ բացառված չէ, որ ԳՄՕ-ի պատճառով բազմաթիվ ալերգիկ ռեակցիաներ են ի հայտ գալիս: Բացի այդ՝ ԳՄՕ-ն կարող է նաեւ ազդել միկրոֆլորայի եւ մարդու աղեստամոքսային համակարգի վրա:  Այն կարող է նաեւ կապված լինել քաղցկեղի տարածման (այս էֆեկտը, էկոլոգի խոսքով, ի հայտ էր եկել առնետների վրա անցկացված փորձարկումների ժամանակ), ճարպակալման եւ հորմոնալ խախտումների հետ:

Էկոլոգ Հրանտ Սարգսյանը իր հերթին նշեց, որ ԳՄՕ-ով սնվող առնետների երրորդ սերունդը արդեն չի կարող բազմանալ: Հատկանշական է նաեւ, որ հողի այն հատվածում, որտեղ առնվազն մեկ տարի գենետիկորեն մոդիֆիկացված բույսեր են աճել, օրգանական բույսերը կարող են այեւս չաճել:

Հիմնական խնդիրն այն է, որ Հայաստանում մենք չենք կարող ստույգ իմանալ, ինչ ենք ուտում: Այսպես, հնարավորություն չկա պարզել, ինչ սերմերից են աճեցված այն մրգերը կամ այն բանջարեղենը, որը մենք գնում ենք շուկայում: Տեսականորեն որոշ դեպքերում կարելի է պարզել ԳՄՕ-ի առկայությունը հատուկ լաբորատորիաներում, սակայն Հայաստանում նման ստուգումներ ոչ մեկ չի իրականացնում:

Հետևեք NEWS.am Medicine-ին Facebook-ում և Twitter-ում