Դեղ արտադրող եւ ներմուծող ընկերությունների ներկայացուցիչների հետ առողջապահության նախարարի հերթական հանդիպման ընթացքում օրակարգում էր ներմուծվող դեղերի գների վերանայման հարցը: Այս մասին հայտնում է ՀՀ առողջապահության նախարարության մամուլի ծառայությունը։
Անդրադառնալով օրեր առաջ մամուլում լայն արձագանք ստացած «Քսելոդա» դեղի` սպառողին չհասնելու մասին տեղեկատվությանը, նշվեց, որ ՀՀ-ում գրանցված է «Քսելոդա» դեղի ազդող նյութ պարունակող այլ արտադրողի («Կապեցիտաբին») դեղը, ինչպես նաեւ շուկայում առկա է վերոնշյալ դեղի համարժեք փոխարինողը:
ՀՀ առողջապահության նախարար Արմեն Մուրադյանը` կարեւորելով դեղերի ոլորտում սոցիալական պատասխանատվության գործոնի առաջնահերթությունը եւս մեկ անգամ դեղ արտադրող եւ ներմուծող ընկերությունների ղեկավարներին հորդորեց վերանայել ներմուծվող դեղերի գները:
Նա շեշտեց, որ դեղերի գների իջեցումը բնակչության համար շատ կարեւոր հանգամանք է, ինչը կնպաստի նաեւ դեղերի ստվերային շրջանառության նվազեցմանը:
Նախարարը մասնակիցներին ներկայացրեց հոկտեմբերին Մոսկվայում կայացած Եվրասիական տնտեսական հանձնաժողովի խորհրդի նախարարական նիստի քննարկման արդյունքները, դեղերի ոլորտին առնչվող խնդիրները, ինչպես նաեւ ձեռքբերումները:
Արմեն Մուրադյանը հանձնարարեց ՀՀ ԱՆ դեղորայքային քաղաքականության վարչությանը, ինչպես նաեւ Է. Գաբրիելյանի անվան դեղերի եւ բժշկական տեխնոլոգիաների փորձագիտական կենտրոնին շարունակել դեղերի մեծածախ եւ մանրածախ գների մշտադիտարկման աշխատանքները եւ ամփոփել արդյունքները:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր