Քաղցկեղով հիվանդների համար դեղը մնում է մաքսային պահեստում. ներմուծողը պատրաստ է դատարան դիմել

«Վագա ֆարմ» ընկերության կողմից Հայաստան ներմուծված «Քսելոդա» անվանումով դեղամիջոցի վաճառքի արգելքի կապակցությամբ ընկերությունը մտադիր է դիմել Կառավարությանը, իսկ բացասական որոշման դեպքում ՝ դատի տալ ՀՀ Առողջապահության նախարարության Դեղերի փորձագիտական կենտրոնին: Այս մասին NEWS.a Medicine –ի թղթակցի հետ զրույցում հայտնել է «Վագա Ֆարմ» ընկերության տնօրեն Վահե Վարսանյանը:

Նա պարզաբանել է, որ ժամանակին Հայաստանում գրանցվել էր «Քսելոդա» դեղամիջոցը, որի փաթեթի վրա 3 տարվա պիտանելիության ժամկետ էր նշված, բայց ներկրվող դեղամիջոցը միշտ երկու տարվա պիտանելիության ժամկետ է ունեցել, այսինքն ավելի խիստ պահանջների է համապատասխանել:

Սակայն այս անգամ մաքսատանը կատարված ստուգման ժամանակ Դեղերի փորձագիտական կենտրոնը որոշել է, որ ներկրված դեղամիջոցը չի համապատասխանում Հայաստանում գրանցված դեղամիջոցին, ու հիմա դեղը պահվում է մաքսային պահեստում: Վահե Վարսանյանը պարզաբանեց, որ «Վագա Ֆարմից» բացի նույնատեսակ իրավիճակում է հայտնվել նաեւ դեղամիջոցի մեկ այլ ներկրող, իսկ շուկայում արդեն զգացվում է օնկոհիվանդների համար նախատեսված այս դեղի պակասը:

Ըստ Առողջապահության նախարարության տեղեկանքի՝ «Փորձաքննության արդյունքում պարզվել է, որ վերագրանցումից հետո առաջին անգամ ներմուծվող դեղի պիտանիության ժամկետը չի համապատասխանում գրանցված դեղի պիտանիության ժամկետին։ Սահմանված ընթացակարգերին եւ ժամկետներին համապատասխան սեպտեմբերի 19-ին տրամադրվել է փորձագիտական եզրակացություն, որի հիման վրա տրվել է ներմուծման մերժման հրաման: Հաշվի առնելով, որ դեղի անվտանգության եւ արդյունավետության գնահատումը բարդ ու պատասխանատու գործընթաց է, առողջապահության նախարարությունը չէր կարող շուտափույթ որոշումներ ընդունել` առանց բավարար հիմքերի: Քանի որ դեղի գրանցման, որակի, անվտանգության եւ արդյունավետության, ներառյալ` պիտանիության ժամկետի որոշման պատասխանատուն հավաստագրի իրավատերն է (Roche ընկերությունը), հետեւաբար գրություն է ուղարկվել` պարզաբանումներ ստանալու նպատակով: Պատասխան գրությունից պարզվում է, որ դեղի բաղադրությունը եւ արտադրական գործընթացը անփոփոխ են, սակայն մատակարարված արտադրանքը նախատեսված է կլիմայական այլ գոտու երկրների համար»:

Վահե Վարսանյանը պարզաբանում է, որ հակառակի դեպքում՝ եթե ներմուծված խմբաքանակի պիտանելիության ժամկետն ավելի երկար լիներ, քան Հայաստանում է ենթադրվում, Դեղերի փորձագիտական կենտրոնի գործողությունները հասկանալի կլինեին: «Չնայած օրենքը չի պահանջում դեղորայքի վերագրանցում պիտանելիության ժամկետների փոփոխության, նույնիսկ դրանց երկարացման դեպքում»,- նշեց նա:

Ինչպես NEWS.am Medecine-ի թղթակցի հետ զրույցում պատմել է քաղցկեղով մի հիվանդ՝ Գագիկ անունով, հոկտեմբերի 2-ին վիրահատել են նրա հաստ աղիքի ուռուցքը, ինչից հետո «Քսելոդա» դեղամիջոցով բուժում են նշանակել։ Արդեն մի ամիս է՝ նա չի կարողանում գտնել նշանակված դեղամիջոցը, որովհետեւ դեղատներում չկա, իսկ ձեռքի վրա շատ թանկ են վաճառում։ Գագիկը դիմել է Առողջապահության նախարարություն, նրան ինչ-որ հեռախոսահամարներ են տվել, որոնցով զանգել է, բայց այդպես էլ կարգին բան չի հասկացել։

Բժիշկ-քիմիոթերապեւտ Լեւոն Բադալյանը NEWS.am Medecine-ի հետ զրույցում հայտնել է, որ «Քսելոդան» քիմիաթերապիայի հատուկ դեղամիջոց է։ Սրա առանձնահատկությունն այն է, որ ընդունվում է դեղահաբերի տեսքով, այսինքն հարմար է հիվանդի համար, գումարած՝ նպատակային ազդեցությամբ դեղամիջոց է, այն հենց քաղցկեղային հյուսվածքներում է ակտիվ նյութի վերածվում։ Դեղամիջոցը հիմնականում կիրառվում է ստամոքսի եւ աղիների, ինչպես նաեւ կրծքագեղձի քաղցկեղի բուժման համար։

Բժշկի խոսքով, դեղամիջոցի պակաս զգացվում է, չնայած որոշ հիվանդներ կողմնակի ուղիներով են ձեռք բերում դա։ Այս դեղամիջոցի լիարժեք փոխարինիչ չկա, հնարավոր է ներարկումների կուրսի նշանակում, բայց դա ժամանակավոր լուծում է։

Հետևեք NEWS.am Medicine-ին Facebook-ում և Twitter-ում