Մեկ գենը կարող է որոշիչ դեր ունենալ գլխուղեղի վնասվածքի դեպքում

Գանգուղեղային վնասվածքի (ԳՈՒՎ)՝ ուղեղի կաթվածի կամ ուղեղի ցնցման բուժումը կարող է տարբեր լինել՝ կախված հիվանդի ախտանիշերի լրջությունից: Մեկ գենի առկայությունը կամ բացակայությունը կարեւոր է այն հարցում, թե որքանով լավ կարող է մարդը վերականգնվել ԳՈՒՎ-ից հետո, ցույց է տվել ամերիկացի գիտնականների նոր հետազոտությունը:

PLOS ONE ամսագրում հրապարակված հոդվածում ցույց է տրված, թե ինչպիսի դեր ունի ուղեղի նեյրոտրոպային գործոնը (BDNF) ԳՈՒՎ-ից հետո վերականգնվելու գործում:

«Այն ուղեղում աճի հիմնական գործոնն է, որը նպաստում է նեյրոգենեզին՝ նոր նեյրոնների ձեւավորմանը,- FoxNews.com-ին տված հարցազրույցում ասել է առաջատար հետազոտող Ահարոն Բարբին Ամերիկայի Իլինոյս նահանգի համալսարանից:- Մենք ենթադրում ենք, որ BDNF-ը որոշիչ դեր ունի ԳՈՒՎ-ից հետո վերականգնվելու եւ վնասվածքից հետո նոր նեյրոնների ձեւավորման գործում»:

Ըստ Բարբիի տեսության՝ կան  BDNF գենի երկու տարբեր բազմաձեւություն՝ Met եւ Val տարբերակները: Քանի որ մարդիկ ծնողներից ժառանգում են ամեն գենի երկու օրինակ, նրանք կարող են ունենալ BDNF-ի 3 համակցությունների տարբերակներից մեկը՝ Val / Val, Val / Met կամ Met / Met:

Մասնագետներն ուսումնասիրել են Վիետնամի պատերազմի 156 վետերանի BDNF-ի գենետիկ տարբերակները: Այդ մարդիկ կռվի ժամանակ գլխի վնասվածք են ստացել: Հետազոտության բոլոր մասնակիցները վնասվածքներ են ունեցել՝ կապված ուղեղի նախաճակատային կեղեւի այն մասի հետ, որը պատասխանատու է պլանավորման, խնդիրների լուծման եւ համալիր վերլուծության համար:

Բարբին ու նրա թիմը վետերաններից գենետիկ հետազոտության համար արյուն են վերցրել, որպեսզի պարզեն, թե նրանցից յուրաքանչյուրը BDNF-ի ինչ տարբերակ ունի: Հետազոտության մասնակիցները նաեւ մի շարք ճանաչողական եւ մտավոր թեստեր են հանձնել:

Թեստերի արդյունքում գիտնականները եզրակացրել են, որ միայն մեկ բազմաձեւությունը հանգեցրել է ճանաչողական գործառույթի մեծ տարբերության: Val/Val համակցություն ունեցող վետերաններն I.Q.-ի թեստի արդյունքում 8 միավոր են հավաքել, շատ ավելի քիչ, քան Val/Met կամ Met/Metհ համակցություն ունեցողները:

«Սա ցույց է տալիս, որ Val/Val համակցությամբ մարդիկ շատ զգայուն են գանգուղեղային վնասվածքների նկատմամբ»,- ասում է Բարբին:

Իմանալով, որ այս տարբերակներն էական դեր ունեն ԳՈՒՎ-ից հետո վերականգնվելու գործում, բժիշկները կկարողանան ինչպես հարկն է ծրագրել բուժումը, ասում է Բարբին:

Հետևեք NEWS.am Medicine-ին Facebook-ում և Twitter-ում