Խոստացել են Շիրակի մարզի ատամնաբույժների բողոքն ընդդեմ առողջապահության էլեկտրոնային համակարգի կառավարությանը հասցնել

Շիրակի մարզի ատամնաբույժները Գյումրիում մարզպետարանի շենքի մոտ բողոքի ակցիա են անցկացրել՝ պահանջելով վերանայել Հայաստանի կառավարության 2017 թվականի օգոստոսի 24-ի 1033–Ն որոշման դրույթները, որով սահմանվում են լիցենզավորված բուժհաստատություններին ներկայացվող պահանջները էլեկտրոնային առողջապահության միասնական տեղեկատվական համակարգին միանալու համար (armed.am): Ցուցարարներին ընդունել են փոխմարզպետ Հարություն Արշակյանը եւ մարզպետարանի սոցապահովության ու առողջապահության վարչության պետ Մեսրոպ Բզնունին: Այս մասին NEWS.am Medicine-ի թղթակցին հայտնեց «Սոլիդենտ» ատամնաբուժական կլինիկայի ղեկավար, մարզի գլխավոր ատամնաբույժ Բաբկեն Մկրտչյանը:

Նրա խոսքով՝ Հարություն Արշակյանը խոստացել է ատամնաբույժների նամակը փոխանցել Շիրակի մարզպետ Արթուր Խաչատրյանին, իսկ նա, իր հերթին, այն կփոխանցի Հայաստանի կառավարությանը:

Նախօրեին Շիրակի մարզի ատամնաբույժները 70 մարդու մասնակցությամբ նիստ են անցկացրել, որի ժամանակ հայտարարություն են ընդունել՝ դրանում շարադրելով առողջապահության էլեկտրոնային համակարգին միանալու որոշման կապակցությամբ իրենց բոլոր պահանջները:

Ատամնաբույժները, մասնավորապես, նշել են, որ համակարգին միանալը սպառնալիքի տակ է դնում անհատական տվյալների անվտանգությունը, ընկերություններից տվյալներ են պահանջվում, որոնք կոմերցիոն գաղտնիք են համարվում, ատամնաբույժներին նաեւ պարտադրում են լրացուցիչ ծախսեր կատարել: Մինչդեռ, նրանց կարծիքով, բոլոր ծախսերը պետք է Առողջապահության նախարարությունն իր վրա վերցներ:

Ատամնաբույժները որոշել են դիմել կառավարությանը՝ 1033–Ն որոշումն անվավեր ճանաչելու առաջարկով, իսկ նոր որոշում ընդունելու համար քննարկումներ անցկացնել ատամնաբույժների հետ, ինչպես նաեւ բողոքի ակցիա անցկացնել մարզպետարանում:

Նշենք, որ 2017 թվականի օգոստոսի 24-ի 1033–Ն որոշումը լիցենզավորված բուժհաստատություններին ներկայացվող պահանջներ է պարունակում  առողջապահության էլեկտրոնային համակարգին միանալու համար, ինչպես նաեւ տարբեր բուժհաստատությունների համար համակարգին միանալու ժամկետները: Կառավարության մեկ այլ որոշմամբ առողջապահության էլեկտրոնային համակարգը փոխանցվել է կոնցեսիոներին, որը համակարգին միանալու սակագներ է սահմանել: Մասնավորապես՝ ատամնաբուժական կլինիկաները ամսական պետք է վճարեն 7 հազարից մինչեւ 20 հազար դրամ՝ կախված հաճախումների թվից, գումարած 30 դրամ յուրաքանչյուր այցելուի համար:

Հիշեցնենք, որ անցյալ տարի մարզային բժշկական կենտրոններն ըմբոստացել էին կոնցեսիոների բարձր սակագների դեմ, որից հետո որոշվել էր էլեկտրոնային առողջապահության համար նրանց ծախսերը սուբսիդավորել:

Համակարգի արագ ներդրման դեմ են բողոքում նաեւ դեղագործական ընկերություններն ու դեղատները, որոնք կառավարությանն են դիմել՝ խնդրելով համակարգի ներդրումը 2 տարով հետաձգել: