Քարվաճառցի աղջկա լսողական իմպլանտին խոսակցական պրոցեսոր են միացրել

14–ամյա քարվաճառցի Կարինե Մինասյանին, ում մեկ ամիս առաջ կոխլեար իմպլանտ են տեղադրել, այսօր, նոյեմբերի 5–ին խոսակցական պրոցեսորն են միացրել եւ ծրագրավորել են իմպլանտը։ Աղջիկը սկսել է ձայներ լսել, սակայն առայժմ չի կարողանում դրանք տարբերակել. նրան երկար եւ քրտնաջան աշխատանք է սպասում սուրդոմանկավարժի հետ։

Ռուսաստանի Աուդիոլոգիայի եւ լսապրոթեզավորման գիտապրակտիկ կենտրոնի կոխլեար իմպլանտացիայի բաժնի ղեկավար Վիգեն Բախշինյանը պարզաբանել է,  որ այսօրվանից սկսվում է բարդ վերականգնողական շրջան, որը մի քանի ամսից մինչեւ մի քանի տարի կարող է տեւել։

Ըստ նրա, վերականգնողական շրջանի տեւողությունը պայմանավորված է մի շարք գործոններով, մասնավորապես, երեխայի տարիքով, նաեւ նրանով, թե որքան ժամանակ է նա խուլ եղել, ինչ վիճակում է նրա խոսքը եւ այլն։ Բժիշկը հույս է հայտնել, որ Կարինե Մինասյանի դեպքում վերականգնման ընթացքը արագ եւ հարթ կլինի, քանի որ աղջիկը լսողական սարք է կրել, նրա խոսակցական ապարատը նորմալ զարգացած է, եւ նա դեռ վիրահատությունից առաջ է սկսել պարապել սուրդոմանկավարժի հետ։

Աղջկա հետ առաջին փորձնական պարապմունքն են անցկացրել, եւ ինչ-որ պահի նա նույնիսկ լաց է եղել զգացմունքների առատությունից: Մանրամասները՝ NEWS.am Medicine-ի տեսանյութում:

Հիշեցնենք, որ NEWS.am գործակալությունը, բարեգործական ակցիայի շրջանակում, Քարվաճառում բնակվող լսողական խնդիրներ ունեցող Կարինե Մինասյանի ընտանիքին էր այցելել: Աղջիկը լրագրողներին պատմել էր, որ երազում է վերականգնել լսողությունն ու վիրաբույժ դառնալ: Լեռնային Ղարաբաղի հանրապետության առողջապահության նախարար Հարություն Քուշքյանն անմիջապես արձագանքել էր Կարինե Մինասյանի մասին տեղեկատվությանը եւ իրեն պատկանող «Էրեբունի» կլինիկայում նրա բուժումն անվճար կազմակերպելու մասին հանձնարարական իջեցրել:

Կարինե Մինասյանի կոխլեար իմպլանտացիան հոկտեմբերի սկզբին ամբողջությամբ բարեգործական հիմունքներով է իրականացվել. իմպլանտը կոխլեար իմպլանտների արտադրությամբ զբաղվող առաջատար Cochlear ավստրալական ընկերությունն է տրամադրել, իսկ մնացած բոլոր ծախսերը «Էրեբունի» բժշկական կենտրոնն է իր վրա վերցրել: Հայաստանում կոխլեար իմպլանտացիայի տասնամյակի կապակցությամբ հիշյալ ընկերությունից որպես նվիրատվություն ստացվել է 18 հազար եվրո արժողությամբ վերջին՝ CI Nucleus Profile Implant մոդելի իմպլանտ խոսքի նորագույն՝ Nucleus 6 մակնիշի պրոցեսորով:

Վիրահատությունը կատարել են «Էրեբունի» ԲԿ ԼՕՌ բաժանմունքի վարիչ Արթուր Շություրյանը եւ Ռուսաստանի Աուդիոլոգիայի և լսապրոթեզավորման գիտապրակտիկ կենտրոնի կոխլեար իմպլանտացիայի բաժնի ղեկավար Վիգեն Բախշինյանը։

Հիշեցնենք նաեւ, որ աղջկա մոր՝ Անահիտ Մինասյանի անունով հաշիվ է բացվել Կոնվերս Բանկում: Չնայած բոլոր բժշկական ծառայությունները «Էրեբունի» բժշկական կենտրոնում անվճար են տրամադրվում Կարինեին, ընտանիքը հետվիրահատական վերականգնման ողջ ընթացքում ստիպված է Երեւանում մնալ եւ ընթացիկ ծախսերը հոգալու կարիք ունի:

Converse bank

AMD 1930051111510100

USD 1930051111510101

[gallery id=39]

Լուսանկարները՝ Արսեն Սարգսյանի