ԱՄՆ-ում առաջին անգամ հավանության է արժանացել աչքի ժառանգական ծանր հիվանդությունների բուժման գենային թերապիայի մեթոդը: Այնուամենայնիվ, թերապիայի գինը շատ բարձր է ` երկու աչքերի համար` 850 հազար դոլար է կազմում: Սա այսօր աշխարհում ամենաթանկ գինն  է, հաղորդում է AP-ն: Այն գերազանցել է ԱՄՆ-ում հաստատված արյան քաղցկեղի գենային թերապիայի երկու այլ մեթոդների արժեքը, որոնք կազմում  են 373 հազար եւ 475 հազար դոլար:

Աչքի հիվանդությունների բուժման նոր  դեղամիջոցը՝ Luxturna-ն մշակվել է  Spark Therapeutics-ի կողմից, որի կենտրոնակայանը գտնվում է Ֆիլադելֆիայում: Այս մեթոդը նախատեսված է այն մարդկանց համար, ովքեր տառապում են Լեբերի ամավրոզով, որը առաջանում է RPE65 գենի խախտման պատճառով՝ դրա արդյունքում չի արտադրվում աչքի ցանցաթաղանքի գործառնության համար անհրաժեշտ պրոտեինը։

Մեթոդը ներառում է հիվանդի աչքի մեջ ձեւափոխված վիրուս պարունակող շիճուկի ներարկում: Մեթոդի կիրառումը տեւում է մոտ 45 րոպե: Այս եղանակը կիրառելի չէ բոլոր հիվանդների համար առանց բացառության, սակայն ընկերության կողմից ֆինանսավորված ուսումնասիրությունը ցույց է տվել, որ տեսողության բարելավումը տեղի է ունենում մոտ մեկ ամիս անց:

Կուրություն ունեցող 20 հիվանդներ փորձնական բուժում են անցել,  որից հետո նրանցից  18-ը հաջողությամբ ինքնուրույն հաղթահարել են լաբիրինթոսը, իսկ նրանցից 13-ը  դա արել է  թույլ լուսավորության ներքո:

Երկու հիվանդների դեպքում, որոնց մոտ բարելավում չէր նկատվել, հնարավոր է դանդաղել է աչքի ցանցաթաղանքի աշխատանքը, սակայն պետք է նշել, որ նրանցից մեկի մոտ դադարել է տեսողության վատթարացման գործընթացը, մյուսի մոտ դրական փոփոխություններ են ի հայտ եկել։

ԱՄՆ-ում դեղերի գներն ինչ-որ կերպ չեն կարգավորվում,  այդ պատճառով  արտադրող  ընկերությունները կարող են  կամայական գներ սահմանել, ինչպես ցանկացած այլ արդյունաբերական ընկերություններ, նշում է AP-ն:

«Մենք ենթադրում  ենք, որ այս գինը արտացոլում է ոչ միայն բեկումնային, կյանքի արժեքը  ակնթարթորեն  փոփոխող Luxturna-ն, այլեւ թույլ է տալիս մեզ շարունակել ներդրումներ կատարել հեղափոխական գիտության մեջ»,-Bloomberg-ին հայտնել է ընկերության ղեկավար Ջեֆ Մարացոն։

Bloomberg-ը  նշում է, որ դեղագործական շուկայում իրական հաջողությունը մեծապես կախված կլինի, թե Spark-ը  ինչպիսի  հարաբերություններ կկառուցի  ապահովագրական ընկերությունների հետ։

Spark-ը դեռ չի բացահայտել, թե քանի հաճախորդ է պատրաստ վճարել թերապիայի համար: Պարզ չէ նաեւ, թե արդյոք ապահովագրական ընկերությունները կամ պետությունը պատրաստ են վճարել աշխարհի ամենաթանկ թերապիայի համար: Ընկերությունը, սակայն, պնդում է, որ դեղագործական ոլորտի համար վճարման ոչ բնութագրական տարբերակներ կառաջարկի՝ մարումներով վճարումներ, ինչպես նաեւ ծախսերի փոխհատուցում, եթե թերապիան անցած պացիենտի տեսողության լավացում չի նկատվում։