Բոստոնի «Բրիգեմ և կանայք» հիվանդանոցից պրոֆեսոր Վիվիանի Տակետիի գլխավորած գիտնականների միջազգային խումբը ցույց է տվել, որ մկանների ներսում ճարպային կուտակումները, որոնք հայտնի են որպես միջմկանային ճարպեր, կապված են սրտի կաթվածի, սրտի անբավարարության և նույնիսկ մահվան բարձր ռիսկի հետ՝ անկախ մարմնի զանգվածի ինդեքսից։ Աշխատանքը հրապարակվել է European Heart Journal (EHJ) ամսագրում:

Հետազոտությանը մասնակցել է կրծքավանդակի ցավի կամ շնչահեղձության գանգատներով, սակայն առանց պսակաձև զարկերակների լուրջ հիվանդությունների նշանների 669 մարդ։ Մասնակիցները վեց տարի գտնվել են հսկողության տակ և անցել են ԿՏ-սկանավորում, որը թույլ է տվել չափել մկաններում ճարպի բաժինը:

Արդյունքները ցույց են տվել, որ նույնիսկ մկաններում ճարպի փոքր ավելացումը զգալիորեն բարձրացնում է սրտի մանր անոթների վնասման և հետագայում սրտանոթային հիվանդությունների զարգացման ռիսկը: Ի տարբերություն ենթամաշկային ճարպի, միջմկանային ճարպը առաջացնում է բորբոքում, գլյուկոզայի փոխանակության խանգարում և մետաբոլիկ համախտանիշ (օրգանիզմում էներգիայի փոխանակության խանգարումներ ճարպային հյուսվածքի ավելացման հետևանքով), ինչը հանգեցնում է անոթների և սրտամկանի վնասման: Միևնույն ժամանակ, մեծ քանակությամբ մկանային զանգված ունեցող հիվանդները, ընդհակառակը, ունեցել են  նման հիվանդությունների ավելի փոքր ռիսկ:

Պրոֆեսոր Տակետին նշել է, որ ավանդական չափանիշները, ինչպիսին է մարմնի զանգվածի ինդեքսը (ՄԶԻ), բավականաչափ ճշգրիտ չեն սրտանոթային հիվանդությունների ռիսկը գնահատելու համար, հատկապես կանանց մոտ, որոնց համար ՄԶԻ-ի բարձր ցուցանիշները ոչ միշտ են մատնանշում ճարպի վտանգավոր բաշխումը: Այս հայտնագործությունը ընդգծում է ախտորոշման ստանդարտների վերանայման և բուժման նոր մոտեցումների որոնման անհրաժեշտությունը:

Գիտնականները պլանավորում են շարունակել հետազոտությունները՝ պարզելու համար, թե ինչպես են ֆիզիկական ակտիվությունը, սննդակարգը և քաշի նվազեցման ժամանակակից դեղամիջոցները ազդում մկաններում ճարպային կուտակումների և սրտի առողջության վրա: Այս գործընթացների հասկացումը կարող է ճանապարհ բացել սրտանոթային հիվանդությունների կանխարգելման և բուժման նոր ռազմավարությունների համար: