Սաութհեմփթոնի համալսարանի գիտնականները Կանադայի և ԱՄՆ-ի գործընկերների հետ միասին հայտնաբերել են լիմֆոմայի նոր ենթատեսակ՝ արյան քաղցկեղի ամենատարածված տեսակներից մեկը, որն ախտահարում է իմունային համակարգի B-լիմֆոցիտները։ Հիվանդության այս տարբերակը դասվում է, այսպես կոչված, դիֆուզ մեծ բջջային B-բջջային լիմֆոմայի (DLBCL) շարքին, սակայն ունի հատուկ տարբերություններ, որոնց պատճառով բժիշկները նախկինում չէին կարողացել ճշգրիտ ախտորոշել այն։

Հետազոտության արդյունքները հրապարակվել են Blood ամսագրում։

Նոր տեսակը ստացել է «DLBCL-ի մաննոզային ենթատեսակ» անվանումը։

Հետազոտողները նկատել են, որ նման հիվանդների ուռուցքային բջիջները ծածկված են մաննոզ կոչվող հատուկ շաքարով, որն օգնում է նրանց գոյատևել և արագ բաժանվել։ Այս հայտնագործությունը անսպասելի էր, քանի որ նախկինում քաղցկեղի զարգացման մեջ նման ածխաջրերի դերը գրեթե չի ուսումնասիրվել։

Աշխատանքի ընթացքում գիտնականները վերլուծել են Կանադայից և ԱՄՆ-ից գրեթե վեց հարյուր հիվանդի հյուսվածքների նմուշները։ Պարզվել է, որ լիմֆոմայի դեպքերի մոտավորապես մեկ երրորդը կարելի է դասել հենց այս նոր ենթատեսակին։ Մաննոզային լիմֆոմա ունեցող հիվանդները, որպես կանոն, ավելի վատ են արձագանքում ստանդարտ բուժմանը և ունեն հիվանդության ավելի ագրեսիվ ընթացք։

Հայտնագործության գլխավոր նշանակությունն այն է, որ այժմ բժիշկները կկարողանան ճանաչել նման հիվանդներին պարզ լաբորատոր թեստերի միջոցով։ Սա թույլ կտա նախապես ընտրել ավելի ճշգրիտ և արդյունավետ բուժում, իսկ ապագայում՝ մշակել նոր դեղամիջոցներ, որոնք ուղղված կլինեն հենց այդ ուռուցքային բջիջների դեմ։

Ինչպես նշել է հետազոտության հեղինակներից մեկը՝ պրոֆեսոր Մաքս Քրիսպինը «սա հազվագյուտ օրինակ է այն բանի, թե ինչպես կարող է շաքարի կառուցվածքը բանալի դառնալ քաղցկեղը հասկանալու համար։ Մաննոզը դուրս է եկել որպես յուրօրինակ նշիչ, որն առանձնացնում է լիմֆոմայի վտանգավոր ենթատեսակը և օգնում է բժիշկներին ավելի ճշգրիտ գործել»։

Գիտնականները հույս ունեն, որ իրենց հայտնագործությունը կփոխի լիմֆոմաների ախտորոշման և բուժման մոտեցումը և կօգնի փրկել բազմաթիվ հիվանդների կյանքը, որոնց համար ներկայիս բուժումները անարդյունավետ են։