Վերջին տարիներին պետությունը մեծածավալ աշխատանք է իրականացրել ազատազրկման վայրերում գտնվող անձանց համար բժշկական օգնության հասանելիությունն ու որակը բարելավելու ուղղությամբ։ Այս մասին այսօր կայացած մամուլի ասուլիսի ժամանակ հայտարարել է ՀՀ առողջապահության նախարար Անահիտ Ավանեսյանը՝ անդրադառնալով քրեակատարողական հիմնարկներում (ՔԿՀ) առողջապահական համակարգի վիճակին։

Ավանեսյանի խոսքով՝ առանցքային ծրագրերից մեկը «Արմավիր» քրեակատարողական հիմնարկում միջազգային լավագույն չափանիշներին համապատասխանող 100 մահճակալանոց ժամանակակից բժշկական կենտրոնի ստեղծումն էր։ Միևնույն ժամանակ, նախարարն ընդգծել է, որ արդիականացումը չի սահմանափակվում միայն մեկ հիմնարկով։ «Մենք չենք սահմանափակվել «Արմավիրով»։ Շարունակվում են ենթակառուցվածքների կահավորման և արդիականացման աշխատանքները նաև մյուս քրեակատարողական հիմնարկներում»,- նշել է նա։ Գերատեսչության ղեկավարի փոխանցմամբ՝ զգալիորեն փոխվել են նաև Հոգեկան առողջության ազգային կենտրոնում բուժում ստացող կալանավորված անձանց և դատապարտյալների պահման պայմանները։ Նախարարը վստահեցրել է, որ նախկին պայմանների համեմատ արձանագրված փոփոխություններն ունեն սկզբունքային նշանակություն։

Պատասխանելով հացադուլ հայտարարած բանտարկյալների վերաբերյալ հարցին՝ Ավանեսյանն ընդգծել է, որ պետությունը պարտավոր է հարգել հացադուլ անելու մարդու իրավունքը, եթե այն իրացվում է օրենքի շրջանակներում։ Դրան զուգահեռ, ըստ նրա, քրեակատարողական հիմնարկների բժշկական աշխատողներն ու սոցիալական ծառայությունները մշտապես աշխատում են նման անձանց հետ՝ փորձելով համոզել նրանց հրաժարվել հացադուլից։ Նախարարը հրաժարվել է մեկնաբանել կոնկրետ դեպքերի մանրամասները՝ հղում անելով իր լիազորությունների սահմանափակումներին, սակայն հավաստիացրել է, որ բոլոր անհրաժեշտ բժշկական ծառայությունները մատուցվում են ամբողջ ծավալով։

«Ես երաշխավորում եմ, որ պացիենտին ցուցված բոլոր բժշկական ծառայությունները տրամադրվում են։ Ազատազրկման վայրերում գտնվող բոլոր անձինք ունեն դեղորայք ստանալու, հետազոտություններ անցնելու և բժշկական օգնություն ստանալու հավասար իրավունքներ»,- ընդգծել է նա՝ հավելելով, որ բժշկական օգնության տրամադրումն իրականացվում է բացառապես գործող օրենսդրության և հաստատված ընթացակարգերի շրջանակներում։

Լրագրողները նախարարին հիշեցրել են իրավապաշտպանների և դիտորդական խմբերի բազմաթիվ հայտարարությունների մասին, որոնք պարբերաբար ահազանգում են քրեակատարողական համակարգում բժշկական օգնության հետ կապված խնդիրների մասին և ուշադրություն հրավիրում բանտարկյալների շրջանում մահացության բարձր մակարդակի վրա։ Ի պատասխան՝ Ավանեսյանը հայտարարել է, որ պետությունը մշտապես ուսումնասիրում է նմանատիպ բոլոր զեկույցները և օգտագործում դրանք համակարգի կատարելագործման համար։

Նրա խոսքով՝ թե՛ Մարդու իրավունքների պաշտպանի (ՄԻՊ), թե՛ անկախ դիտորդական խմբերի զեկույցները վկայում են վերջին հինգ տարիներին արձանագրված զգալի առաջընթացի մասին։ «Իհարկե, չի կարելի ասել, թե բոլոր խնդիրներն արդեն լուծված են։ Բայց բոլոր ուղղություններով շատ լուրջ փոփոխություններ են տեղի ունեցել»,- ասել է նախարարը։ Նրա համոզմամբ՝ բժշկական օգնության որակի գնահատումը չի կարող հիմնվել միայն մահացության վիճակագրության վրա, քանի որ այն ներառում է բազմաթիվ տարբեր ցուցանիշներ՝ բժշկական ծառայությունների հասանելիությունը, բուժման որակը, ենթակառուցվածքների վիճակը, հիմնարկների հագեցվածությունը և այլ չափանիշներ։

Նախարարը նաև հրավիրել է լրագրողներին անձամբ այցելել ՔԿՀ-ներ՝ տեղում իրավիճակի փոփոխություններին ծանոթանալու համար։ Միևնույն ժամանակ նա ընդունել է, որ առանձին հիմնարկներում ենթակառուցվածքային խնդիրները դեռևս ամբողջությամբ վերացված չեն, սակայն վստահեցրել է, որ աշխատանքները շարունակվում են։