նախընտրելի դարձնել
Կանանց մարմնում քիմիական նյութերի բարձր մակարդակի առկայությունը վաղաժամ մենոպաուզայի է հանգեցնում: Այսպիսի եզրահանգման են եկել Washington University School of Medicine-ի հետազոտողները:
Գիտնականները մենոպաուզայի շրջանում գտնվող 1,442 կնոջ են հեատոզետել: Նրանք նաեւ ուսումնասիրել են 1999-2008 թթ. հետազոտության տվյալները, որին 31,575 մարդ է մասնակցել:
Հետազոտության մասնակից կանանց միջին տարիքը 61 է եղել, եւ նրանցից ոչ ոք էստրոգենային թերապիա չի անցել կամ ձվարանների հեռացման վիրահատություն չի կատարել: Բոլոր կանանց մոտ ստուգել են էնդոկրին համակարգը խախտող քիմիական նյութերի մակարդակները:
Իրենց հետազոտության ընթացքում գիտնականներն ստուգել են կանանց արյան եւ մեզի մեջ առկա հիմնականում արհեստական 111 քիմիական նյութերի մակարդակները, որոնք ենթադրվում է, միջամտում են բնական հորմոնի արտադրմանը եւ բաշխմանը:
Քիմիական նյութերի շարքում են եղել պլաստմասե սպասքի, ընդհանուր կենցաղային իրերի, դեղամիջոցների եւ անձնական հիգիենայի պարագների մեջ պարունակվող ֆտալատները, բուսական ծագման ֆիտոէստրոգենները, դիօքսինները/ֆուրանները եւ այլն:
Գիտնականները նաեւ նշել են, թե հատկապես որ քիմիական նյութերն են վաղ մենոպաուզայի հանգեցնում՝ 9 պոլիքլորացված բիֆենիլներ (PCBs), 3 պեստիցիդներ, 2 ֆտալատներ եւ ֆուրան (թունավոր քիմիական նյութ):
«Այդ քիմիական նյութերից շատերը մեր վերահսկողությունից դուրս են, որովհետեւ դրանք պարունակվում են օդում, ջրում եւ աղի մեջ: Բայց մենք ինքներս մեզ կարող ենք պաշտպանել այդ քիմիական նյութերի ազդեցությունից եւ ավելի շատ տեղեկանալ պլաստմասե եւ կենցաղային այլ իրերի մասին, որոնք մենք օգտագործում ենք մեր առօրյա կյանքում»,-ասել է հետազոտության հեղինակ Ամբեր Կուպերը:
Քիմիական նյութերի ազդեցությունից պաշտպանվելու համար վերջինս խորհուրդ է տալիս սնունդը միկրոալիքային վառարանի մեջ տաքացնել ապակյա տարաների կամ թղթյա փաթեթների մեջ՝ խուսափելով պլաստմասե սպասքից: Կարեւոր է նաեւ գնումներ կատարելուց առաջ ուշադիր կարդալ կոսմետիկայի, անձնական խնամքի միջոցների եւ սննդի փաթեթավորման բաղադրիչները: Մասնագետները հիշեցնում են, որ, օրինակ, ԱՄՆ-ում որոշ քիմիական նյութերի օգտագործումն արգելված է, մինչդեռ դրանք օգատգործվում են շատ ուրիշ երկրներում:
Կուպերի խոսքով, այս հետազոտությունը չի ապացուցում քիմիական նյութերի եւ վաղ մենոպաուզայի պատճառահետեւանքային կապը, սակայն խոսում է քիմիական նյութերի՝ այդ խնդրի հետ ասոցիացիայի մասին, ուստի հետազոտության արդյունքները դեռ հետագա ուսումնասիրության կարիք ունեն:
