Յոգան  մկանային ուժի եւ ճկունության համար վարժությունների ուղղակի համալիր չէ:  Կլինիկական ուռուցքաբանության ամսագրում հրապարկված նոր հետազոտությունը բացահայտել է, որ կրծքագեղձի քաղցկեղը հաղթահարած հիվանդների  համար յոգան կարող է լինել հոգնածության նվազեցման եւ առողջության ընդհանուր վիճակի բարելավման անվտանգ մեթոդ:

Կրծքագեղձի քաղցկեղի բուժումից հետո կանայք հաճախ վատ են  քնում, ինչը կարող է  հոգնածության եւ բորբոքման ավելացման հանգեցնել:

Կրծքագեղձի քաղցկեղից հետո վերականգնվող կանանց համար մարմնամարզությունը հոգնածության եւ բորբոքման նվազեցման լավագույն մեթոդներից մեկն է, հաղորդում է Fox News-ը:

Կրծքագեղձի քաղցկեղով հիվանդների համար հետազոտողներն ընտրել են յոգան, քանի որ այն ունի բարդության մի քանի մակարդակ, ինչպես նաեւ հատուկ հարմարեցված տարեբրակ ֆիզիկական սահմանափակումներով կանանց համար:

Օհայո նահանգի համալսարանի հետազոտողները վեց տարվա ընթացքում  ուսումնասիրել են կրծքագեղձի քաղցկեղով կանանց մոտ բորբոքային պրոցեսները, տրամադրության փոփոխությունները եւ  հոգնածության զգացողությունը:

Հետազոտությանը մասնակցել են 27-76 տարեկան  200 կին, ովքեր  անցել են հատհա-յոգայի 12-շաբաթյա կուրս:

Անմիջապես  փորձարկումից հետո յոգայի խմբում դիտվել է  հոգնածության մակարդակի նվազում 41%-ով, իսկ բորբոքման ցուցանիշները զգալիորեն ցածր են եղել, քան յոգայով չզբաղվող ստուգիչ խմբում: Հետազոտողները կանանց ուսումնասիրել են երեք ամիսների ընթացքում եւ կրկին լավացում են բացահայտել: Յոգայով զբաղվող կանայք 57%-ով ավելի քիչ են հոգնել եւ 13-20%-ով ավելի քիչ բորբոքումներ են ունեցել, ի տարբերություն ստուգիչ խմբի:

Բացի դրանից,  ի տարբերություն հոգնածության, բորբոքման եւ տրամադրության բուժման դասական եղանակների, յոգան չունի կողմնակի ազդեցություններ: