Առաջնեկներն ունեն սիրտ-անոթային հիվանդությունների եւ շաքարախտի  ավելի բարձր ռիսկ , ցույց է տվել նոր հետազոտությունը:

Նոր Զելանդիայում կատարված ոչ մեծ հետազոտության ընթացքում գիտնականները հետեւել են 40-50  տարեկան հավելյալ քաշ ունեցող  50 առաջնեկ տղամարդու, համեմատելով նրանց ՄԶՑ (մարմնի զանգվածի ցուցանիշը) նույն ընտանիքում երկրորդ ծնված տղամարդկանց հետ:  Հետազոտողները նաեւ դիտարկել են  արյան մեջ գլյուկոզայի մակարդակը կարգավորող ինսուլինի հանդեպ զգայունությունը:

Նրանք բացահայտել են, որ չնայած երկու խմբում էլ  տղամարդիկ ունեցել են միանման միջին հասակ, առաջնեկների մոտ քաշը 15 ֆունտով ավելի է եղել: Իսկ ՄԶՑ-ը առաջնեկների շրջանում կազմել է 29, ի տարբերություն երկրորդ երեխաների, որոնց դեպքում այդ ցուցանիշը կազմել է 27.5:  Բարձր ՄԶՑ ունեցող մարդիկ սիրտ-անոթային հիվանդությունների  ավելի բարձր ռիսկ ունեն:

Համաձայն հետազոտության տվյալների, առաջնեկների մոտ ինսուլինի հանդեպ զգայունությունը 33% -ով ցածր է եղել, ի տարբերություն երկրորդը ծնված տղամարդկանց: Ինսուլինի  հանդեպ ցածր զգայունություն ունեցող մարդկանց  օրգանիզմի բջիջները ինսուլինի առկայությանը արձագանքելու ավելի փոքր ունակություն են ունեցել, այդ պատճառով էլ ենթաստամոքսային գեղձը պետք է  ավելի շատ աշխատի, որ կոմպենսացնի այդ վիճակը: Դա ստեղծում է 2-րդ տիպի շաքարախտի  զարգացման բարձր ռիսկ, տեղեկացնում է Fox News-ը։

Պարզ չէ, թե ինչպես է ծնվելու հաջորդականությունն ազդում  նյութափոխանակության վրա, բայց հնարավոր է, պլացենտայում արյան շրջանառության առանձնահատկությունները որոշակի դեր են խաղում, ասում են հետազոտողները:  Կնոջ առաջին հղիության ժամանակ արգանդի արյունատար անոթները եւ լորձաթաղանթը երկարատեւ կառուցվածքային փոփոխությունների են ենթարկվում՝ ավելի բարենպաստ պայմաններ ստեղծելով հետագա պտուղների համար:

Հետազոտողները զգուշացնում են, որ իրենց ուսումնասիրությունները վերաբերում են միայն քաղաքային շրջաններում բնակվող գեր տղամարդկանց, եւ արդյունքները չեն կարող վերաբերել այլ խմբի մարդկանց: