Նեւրոզն այսօր ամենատարածված հիվանդությունների թվին է դասվում ինչպես Հայաստանում, այնպես էլ այլ երկրներում:  Դրանց լայն տարածումը հավանաբար կապված է մեծ քանակությամբ սթրեսների հետ, որոնց անընդհատ բախվում ենք:    Հնարավո՞ր է ինչ-որ եղանակով կանխել նեւրոզի տարածումը: Այդ հարցի վերաբերյալ իր կարծիքն է հայտնել սեքսապաթոլոգ Մարատ Զաքարյանը: 

Նրա խոսքով, նեւրոզի պրոֆիլակտիկայում ամենակարեւորը սթրեսներից ու բախումներից  հնարավորինս խուսափելն է ինչպես աշխատանքում, այնպես էլ տանը:   Դրա համար ցանկալի է հնարավորինս կարգավորել ընտանեկան, աշխատանքային եւ իհարկե սեռական հարաբերությունները, որովհետեւ նեւրոզը հաճախ կապված է լինում սեռական հարաբերությունների հետ: 

Մարդիկ կան, որոնք անընդհատ բախումների են ձգտում եւ նման են քայլող տհաճության. սեքսապաթոլոգի կարծիքով ցանկալի է հեռու մնալ նման մարդկանցից: 

Մարատ Զաքարյանը նաեւ նշել է, որ ուրախ, ուժեղ, հավասարակշռված եւ ինքնավստահ մարդիկ հազվադեպ են նեւրոզով հիվանդանում: Դրա համար էլ պետք է ջանալ ինքդ քո մեջ զարգացնել այդ հատկանիշները: 

Իսկ երեխաների մոտ նեւրոզի պրոֆիլակտիկայի համար չափազանց կարեւոր է ճիշտ վերաբերվել նրանց դաստիարակությանը, երեխային մեղավորության, անլիարժեքության կամ էլ հակառակը՝ գերազանցության զգացում չներարկել:    Երեխայի եւ ծնողների միջեւ պիտի նորմալ, առողջ հարաբերություններ լինեն, երեխան պիտի անընդհատ լարված չլինի՝ պատժի սպասելով կամ էլ մեղավորություն զգալով այս կամ այն արարքի համար:  

Որոշ մասնագետներ նաեւ խորհուրդ են տալիս նեւրոզների պրոֆիլակտիկայի նպատակով հնարավորինս վառ լուսավորություն ապահովել, որովհետեւ լույսը նպաստում է սերոտոնինի արտադրությանը, պետք է ջանալ բավարար չափով քնել, լիարժեք սնվել, ընդ որում սննդակարգում մեծ տեղ պիտի զբաղեցնեն  վիտամինների եւ միներալների բարձր տոկոս պարունակող մթերքները: Իսկ սուրճից ու ալկոհոլային խմիչքներից ցանկալի է հրաժարվել: