Օսթեոպորոզը բարդ եւ միջմասնագիտական խնդիր է, որի կանխարգելումն ու բուժումը համալիր մոտեցում է պահանջում:  NEWS.am Medicine-ի թղթակցի հետ զրույցում նման կարծիք է հայտնել Հայաստանի առողջապահության նախարության գլխավոր էնդոկրինոլոգ Էդվարդ Թորոմանյանը:

Նրա կարծիքով, օսթեոպորոզը ոչ միայն նեղ մասնագետների ուշադրությունն է պահանջում` վնասվածքաբանների, էնդոկրինոլոգների, գինեկոլոգների, այլեւ, օրինակ, ընդհանուր բժշկության մասնագետների: Տարբեր ոլորտների բժիշկները պիտի իրենց ջանքերը միավորեն այդ հիվանդության դեմ: 

Ինչպես նշել է բժիշկ Թորոմանյանը, օսթեոպորոզի խնդիրն այսօր շատ այժմեական է Հայաստանում. ոսկրերի ջարդվածքների բավականին մեծ քանակ է արձանագրվում: Որպեսզի նման դեպքերը պակասեն, մասնագետի կարծիքով անհրաժեշտ է ավելացնել կանխարգելման աշխատանքները եւ բնակչությանն իրազեկել այդ հիվանդության եւ նրա զարգացման ռիսկերի մասին:   

Դեպքերի մեծ մասում օսթեոպորոզն ախտորոշվում է այն բանից հետո միայն, երբ հիվանդը   (ավելի հաճախ` կին հիվանդը) կոտրվածքով հայտնվում է հիվանդանոցում, որի պատճառը ընկնելն է կամ թեթեւ հարվածը:  Մինչեւ կոտրվածքը, հիվանդների մեծամասնությունը չի էլ կասկածում, թե ինքը ոսկրերի ամրության խնդիր ունի, չնայած այդ խնդիրը շատ հեշտ է հայտնաբերել հատուկ սարքի` դենսիտոմետրի միջոցով:

Հիշեցնենք, որ այսօր, բժիշկ Ջոն Բիլեզիկյանի եւ Hologic Corporation ընկերության ջանքերի շնորհիվ  Երեւանում  6 դենսիտոմետր կա, իսկ եւս մեկը կա Գյումրիում:  2016-ին եւս երկու դեսնիտոմետր ստանալով` Հայաստանը աշխարհի առաջատարներից մեկը կլինի բնակչության շնչին ընկնող նման սարքերի թվով:  

Օսթեոպորոզի կանխարգելման համար շատ կարեւոր է իմանալ նաեւ այդ հիվանդության զարգացման ռիսկը մեծացնող գործոնների, ինչպես նաեւ այն մասին, թե ինչպես է պետք սնվել առողջ ոսկորներ ունենալու համար եւ որ դաշտանադադարից հետո հորմոնափոխարինիչ թերապիան կարող է օգնել նվազեցնել օսթեոպորոզի ռիսկը: