Harvard Medical School-ի գիտնականներին հաջողվել է լաբորատորիայում սրտային  գործող հյուսվածք մշակել: Իհարկե, առայժմ շատ վաղ է խոսել աշխատող իսկական սիրտ աճեցնելու հնարավորության մասին, սակայն  գիտնականների աշխատանքը կարեւոր քայլ է այդ ուղղությամբ:  

Մի քանի տարվա հետազոտությունների ընթացքում հետազոտողները Հարոլդ Օտտի գլխավորությամբ 73 դոնորային սիրտ են օգտագործել, որոնք հարմար չէին փոխպատվաստման համար: Նրանք հեռացրեցին սրտային հյուսվածքի բջիջները` պահպանելով միայն արտաբջջային մատրիքսը եւ չվնասված արյունատար անոթները: Դրանից հետո  սրտի հիմնակմախքում  կարդիոմիոցիտներ տեղադրեցին, որոնք ստացվել էին բազմապոտենտ ցողունային բջիջներից: Բջիջներն աճեցվում էին   120 օրվա ընթացքում. այդ եղանակով աճեցված սրտային հյուսվածքն աշխատում էր իսկականի նման եւ կրճատվում էր էլեկտրական ազդակներին ի պատասխան: 

Հեղինակները հույս ունեն, որ մոտ ապագայում արդեն հնարավոր կլինի այդ տեխնոլոգիան օգտագործել  «կարկատանների» ստեղծման համար, որոնց օգնությամբ հնարավոր կլինի փոխարինել սրտամկանային հյուսվածքի սրտի կաթվածի հետեւանքով վնասված  հատվածները: 

Գիտնականները նաեւ պիտի միջոց գտնեն օպտիմալացնելու աճեցման գործընթացն ու մեթոդները, որպեսզի սկսեն գործող բջիջների ավելի մեծ քանակություն ստանալ: Ամբողջական սրտի ստացման համար, օրինակ, գիտնականներին անհրաժեշտ կլինի տասնյակ միլիարդավոր բջիջներ ստեղծել: Անհրաժեշտ կլինի նաեւ ստացված հյուսվածքները հիվանդի աշխատող սրտի մեջ ներմուծելու արդյունավետ միջոց գտնել: 

Այդ մասին հաղորդում է Circulation Research ամսագիրը: