նախընտրելի դարձնելԱռողջության համընդհանուր ապահովագրության համակարգի ներդրումը Հայաստանում բժիշկներին ստիպել է ընտրություն կատարել իրենց մոտ բուժվողների թվի և բժշկական օգնության որակի միջև: Դրա մասին «Հայաստան» խորհրդարանական խմբակցության կազմակերպած ապահովագրական համակարգի վերաբերյալ քննարկման ժամանակ հայտարարել է սրտաբան, բժշկական գիտությունների թեկնածու Էլիզաբեթ Գրիգորյանը:
Բժիշկը նշել է, որ գործող համակարգը լուրջ ճշգրտումների կարիք ունի: «Ապահովագրական համակարգը չի կարող կայուն լինել, եթե այն չի ապահովում բժիշկների աշխատանքի կայունությունը»,- ընդգծել է նա՝ նշելով, որ բուժաշխատողների վճարման մեթոդաբանության փոփոխությունը նրանց համար անբարենպաստ է եղել: Ավելին, այս փոփոխություններն իրենց մաշկի վրա են զգացել ինչպես պետական, այնպես էլ մասնավոր կլինիկաների աշխատակիցները:
Այնուամենայնիվ, անարդար վարձատրությունը միակ խնդիրը չէ: Գրիգորյանը որպես մեկ այլ լուրջ խնդիր նշել է վարչական ծանրաբեռնվածության աճը: Ըստ նրա՝ բժիշկներն այսօր ստիպված են միաժամանակ շփվել հիվանդների հետ, լրացնել թղթային ձևաթղթեր և տվյալներ մուտքագրել էլեկտրոնային համակարգ, որոնք բոլորը պետք է արագ անեն: Գրիգորյանի խոսքով՝ նման համակարգն անխուսափելիորեն ռիսկի է ենթարկում բժշկական օգնության որակը: «Հիվանդին ընդունելը տևում է մոտ 20 րոպե։ Այս ընթացքում բժիշկը պետք է զննի հիվանդին, բուժում նշանակի, լրացնի ձևաթղթերը և բոլոր տվյալները մուտքագրի համակարգ։ Գործնականում պարզվում է, որ մենք ավելի շատ ժամանակ ենք անցկացնում համակարգչի հետ շփվելով, քան հիվանդի»,- նշել է նա։ Սրտաբանն ընդգծել է, որ ժամանակը բժշկի ամենակարևոր ռեսուրսն է, և դրա պակասն ուղղակիորեն ազդում է ախտորոշման և բուժման որակի վրա։
Ըստ Գրիգորյանի՝ մոդելի փոփոխությունից հետո բժշկի եկամուտն այժմ հիմնականում կախված է ընդունած հիվանդների քանակից։ «Այս մոդելն անխուսափելիորեն կրճատում է բժշկի՝ յուրաքանչյուր հիվանդին հատկացվող ժամանակը։ Երբ բժիշկը ստիպված է լինում չափազանց արագ ընդունել հիվանդներին, ախտորոշիչ սխալների ռիսկը մեծանում է»,- ընդգծել նա՝ հավելելով, որ դա հանգեցնում է կրկնակի ախտորոշումների անհրաժեշտության, ինչը անմիջականորեն ազդում է ֆինանսների վրա։
«Արդյունքում, առողջապահական համակարգի ընդհանուր ծախսերը նույնպես աճում են։ Ավելի հանգիստ և համապարփակ նախնական խորհրդատվությունը, ընդհակառակը, երկարաժամկետ հեռանկարում կրճատում է համակարգի ծախսերը», - ընդգծել է նա։
Գրիգորյանը նշել է, որ բժշկի աշխատանքի մեջ ներդրում կատարելը ներդրում է ամբողջ առողջապահական համակարգի կայունության մեջ։ «Մենք ևս մեկ անգամ ընդգծում ենք. մեր նպատակը ապահովագրական համակարգին դեմ լինելը չէ։ Մեր նպատակն է այն կայուն դարձնելը նաև բժիշկների համար։ Բժիշկները չպետք է ընտրություն կատարեն ավելի շատ հիվանդներ ընդունելու և բարձրորակ բժշկական օգնություն մատուցելու միջև»,- շեշտել է նա։
Սրտաբանն ընդգծել է, որ առանց խնդիրների բաց և կառուցողական քննարկման անհնար կլինի դրական արդյունքների հասնել։
