Ինչպես հայտնի է, առողջ կենսակերպը կրճատում է քաղցկեղային հիվանդությունների զարգացման ռիսկը: Սակայն առողջ կենսակերպը միայն ճիշտ սնունդը չէ, այլեւ` ֆիզիկական ծանրաբեռնվածությունը եւ ծխելուց հրաժարումը: Կան նաեւ շատ այլ քիչ հայտնի գործոններ, որոնք կարող են օգնել պահպանել առողջությունը եւ պաշտպանվել շատ հիվանդություններից, այդ թվում` քաղցկեղային:
1. Մի մոռացեք արեւապաշտպան քսուքի մասին
Արեւի ճառագայթներն ուղղակիորեն կապված են մաշկի քաղցկեղի մի քանի տարատեսակի զարգացման հետ, այդ պատճառով անհրաժեշտ է մաշկը պաշտպանել դրանց ազդեցությունից: Փողոցում ջանացեք փակ հագուստ կրել, գլխարկ եւ ակնոց, իսկ մաշկի բաց հատվածները պաշտպանեք արեւայրուքի դեմ քսուքով:
2. Պատվաստում արեք
Քաղցկեղի որոշ տեսակներ հնարավոր է կանխարգելել պատվաստման միջոցով: Օրինակ` հեպատիտ В-ի դեմ պատվաստումը նվազեցնում է լյարդի խրոնիկական հիվանդությունների եւ լյարդի քաղցկեղի ռիսկը: Մարդու պապիլոմայի վիրուսը (ՄՊՎ) ուղղակիորեն կապված է արգանդի վզիկի, կոկորդի եւ գլխի քաղցկեղի զարգացման հետ, իսկ այդ վիրուսի դեմ պատվաստումը կարող է պաշտպանել քաղցկեղի վերը թվարկված տեսակներից:
3. Անվտանգ սեքսով զբաղվեք
Ռիսկային պահվածքը կարող է հեպատիտ С-ով, մարդու պապիլոմայի վիրուսով եւ այլ վարակներով վարակման պատճառ դառնալ, որոնք մեծացնում են քաղցկեղի որոշ տեսակների, օրինակ` արգանդի վզիկի քաղցկեղի զարգացման ռիսկը: Այդ պատճառով մասնագետները խորհուրդ են տալիս միայն անվտանգ սեքսով զբաղվել. Պահպանակ օգտագործել:
4. Մի մոռացեք կանխարգելիչ հետազոտությունների մասին
Որեւէ ախտանիշի բացակայության պարագայում կանոնավոր հետազոտությունները կարող են օգնել ժամանակին հայտնաբերել քաղցկեղը, ինչը զգալիորեն կմեծացնի բուժման շանսերը: Օրինակ, կանանց խորհուրդ է տրվում կանոնավոր կերպով պապ-թեստեր անել եւ գնալ մամոգրաֆիական հետազոտության, իսկ տղամարդկանց` հետազոտել շագանակագեղձը:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր