Հայաստանի կլինիկաներում աշխատող նեոնատոլոգների համար բժշկական ընթացակարգեր են մշակվում, որոնց շնորհիվ հնարավոր կլինի մեծացնել աշխատանքի արդյունավետությունը եւ նվազեցնել մահացությունը նորածինների շրջանում: Այդ մասին NEWS.am Medicine-ի թղթակցին հայտնել են Նեոնատալ բժշկության հայկական ասոցիացիայի ղեկավար, Երեւանի գլխավոր նեոնատոլոգ, Հայաստանի գլխավոր մանկական ռեանիմատոլոգ Հրանտ Քալենթերյանը եւ Հայաստանում նեոնատալ ծառայությունների բարելավման ծրագրի ղեկավար Անուշ Դավթյանը:
Անուշ Դավթյանը նշել է, որ Հայաստանում նեոնատալ ծառայությունների բարելավման ծրագիրը նախատեսված է 2 տարվա համար. այն մեկնարկել է 2015-ի հոկտեմբերին եւ կշարունակվի մինչեւ 2017-ի հոկտեմբերը. ծրագրի նպատակն է բարելավել նեոնատալ ծառայությունների որակը եւ նվազեցնել մահացությունը նորածին երեխաների շրջանում:
Նախատեսված է 2-րդ կարգի ծննդատների ընթացակարգերի վրա աշխատանքն ավարտել մայիսին, իսկ մինչեւ դեկտեմբեր պատրաստ կլինեն ընթացակարգերը նաեւ 3-րդ կարգի ծննդատների համար: Դրանք բոլորը կհրապարակվեն, ինչից հետո դրանք կտրամադրեն հայ նեոնատոլոգներին: Հետագայում 2 տարվա ընթացքում մասնագետները կհետեւեն շրջանային կլինիկաներում այդ ընթացակարգերի ներդրմանը եւ կգնահատեն այնտեղ աշխատող մասնագետների պատրաստվածության աստիճանը:
Ծրագրի շրջանակում նախատեսված է նաեւ նեոնատոլոգիայի ոլորտում ներդնել նորագույն տեխնոլոգիաներ, մասնավորապես` 35 մարզային ծննդատանը 3G կապով պլանշետներ կբաժանեն, որոնց օգնությամբ մասնագետները կկարողանան օրվա ցանկացած ժամի եւ շաբաթը 7 օր խորհրդակցել երեւանի «Մուրացան» մանկական կլինիկայի մասնագետների հետ: Եթե մարզային հիվանդանոցներից մեկում բարդ դեպք լինի, բժիշկները կկարողանան ոչ միայն արագ նկարագրել այն երեւանցի գործընկերներին, այլեւ տեսախցիկի օգնությամբ ցույց տալ բուժման կարիք ունեցող երեխային:
Նախատեսված է նաեւ Հայաստանում ներդնել երեխաների եւ ծննդկանների հետ աշխատող նեոնատոլոգների եւ բուժքույրերի առցանց վերապատրաստում:
Հրանտ Քալենթերյանը նշել է, որ Նեոնատալ բժշկության հայկական ասոցիացիան մոնիտորինգ է իրականացրել Հայաստանում ծննդատների վիճակի վերաբերյալ եւ կազմել է նրանցից յուրաքանչյուրում պակասող սարքավորումների ցուցակը: Մասնագետները հույս ունեն, որ ծրագրի շրջանակում USAID-ը կլինիկաների համար նաեւ այնպիսի սարքավորումներ կապահովի, որոնք կբարելավեն տրամադրվող նեոնատալ ծառայությունների մակարդակը:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր