Հնդկաստանում ծնվել է աշխարհի ամենածանր աղջիկը. նա 6.8 կգ է կշռում, միջին վիճակագրական վեցամսական երեխայի չափ:
Աղջկա մայրը` Նանդինի անունով 19-ամյա կինը, շատ է զարմացել` տեսնելով, թե ինչ խոշոր է իր աղջիկը: Սովորաբար նորածին երեխաներն առավելագույնը 3-3.5 կգ են կշռում:
Ինքը` Նանդինին եւս խոշոր կին է, հասակը 175 սմ է, քաշը` 94 կգ: Նրա հղիությունը նորմալ է ընթացել, առանց որեւէ բարդության, եւ կինը նույնիսկ չէր ենթադրում, թե իր աղջիկն այսքան խոշոր կլինի: Հետաքրքիր է, որ Նանդինին դիաբետ չունի, չնայած սովորաբար հենց հղիների դիաբետն է հանգեցնում նորածինների ճարպակալման:
Քանի որ Նանդինին չէր կարող ինքնուրույն ծննդաբերել նման խոշոր երեխա, նրան կեսարյան հատում է արվել: Այժմ նորածինը, որին առայժմ անուն չէր դրել, բժիշկների վերահսկողության տակ է, բայց մոտ ժամանակներս նախատեսված է նրան դուրս գրել հիվանդանոցից:
«Նա մեզ համար մեծ անակնկալ էր: Վիրահատությունը մոտ մեկ ու կես ժամ է տեւել եւ դրա ընթացքում ոչ մի խնդիր չի առաջացել», - պատմել է Պուրնիմա Մանուն` կեսարյան հատում իրականացրած գինեկոլոգը: «Երեխան առողջության հետ կապված ոչ մի խնդիր չունի, ինչպես օրինակ արյան մեջ շաքարի բարձր մակարդակը կամ վահանագեղձի հետ կապված խնդիրներ: Նրա շնչառությունը եւս կարգին է»:
«Իմ 25-ամյա պրակտիկայի ընթացքում ես ոչ մի անգամ նման խոշոր երեխա չեմ տեսել», - խոստովանել է բժիշկ Բենկատեշ Ռաջուն: «Նա ուղղակի հրաշք է: Ենթադրում եմ, նա ամենածանր աղջիկն է ոչ միայն Հնդկաստանում, այլեւ ամբողջ աշխարհում»:
Մինչ այժմ ամենախոշոր աղջիկ էր համարվում Կարիսա Ռուսակը, որը ծնվելիս 6.4 կգ էր կշռել: Իսկ աշխարհի ամենածանր երեխան, Գինեսի ռեկորդների գրքի համաձայն, ծնվել է 1897-ին` Կանադայում եւ կշռել է 10.8 կգ:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր