Երեւանի «Էրեբունի» բժշկական կենտրոնում քնային զարկերակի բազմամակարդակ (տանդեմային) ստենոզի վերացման բարդ վիրահատություն է կատարվել: Բացի այն, որ նման վիրահատությունն ինքնին բարդ է, 62-ամյա հիվանդը նախկինում միոկարդի կաթված էր տարել, ինչը բժիշկների բրիգադի համար լրացուցիչ բարդություններ էր ստեղծում. վիրահատության ընթացքում անհրաժեշտ էր մշտապես վերահսկողության տակ պահել սրտի աշխատանքը, իսկ վիրահատությունը 9 ժամ է տեւել: Բայց այդ վիրահատությունը տղամարդուն փրկել է ուղեղի անխուսափելի կաթվածից:
Վիրահատող վիրաբույժ, «Էրեբունի» բուժկենտրոնի Պարանոցի անոթների եւ սրտի վիրաբուժության ծառայության ղեկավար Մեսրոպ Շատախյանը NEWS.am Medicine-ի թղթակցին հայտնել է, որ հիվանդը բազմամակարդակ ստենոզ ուներ եւ ընդհանուր քնային զարկերակի հիմքի պրոթեզավորումը կամ շունտավորումը հնարավոր չէր իրականացնել:
«Մենք որոշում կայացրեցինք ձախ ընդհանուր քնային զարկերակի նոր հիմք-ցողուն ստեղծել, որը սկսվում է ենթաանրակային զարկերակի դիստալ հատվածից: Մենք փակել ենք նրա բնածին հիմքը եւ նոր սինթետիկն ենք կառուցել, որն անցկացրել ենք ուսային եւ պարանոցային մկանների եւ նյարդերի տակով եւ միացրել ենք ձախ ընդհանուր քնային զարկերակի դիստալ հատվածին», - պատմել է վիրաբույժը: Բացի այդ, ներքին քնզարկերակի ավանդական կարոտիդային էնդարտերէկտոմիա է կատարվել: «Դա ստենոզի վերջին մակարդակն է, մենք այն մաքրել ենք, լայնացրել ենք զարկերակը եւ կարել ենք: Այժմ ամբողջությամբ վերականգնվել է հիվանդի արյան շրջանառությունը դեպի ուղեղի ձախ կիսագունդ», - ասել է բժիշկը: Գլխուղեղը սնուցող անոթների նման բարդ ախտահարումով կապակցված վիրահատություն Հայաստանում առաջին անգամ է կատարվել։
Լրագրողների հետ զրույցում ինքը` հիվանդը պատմել է, որ Մոսկվայում է եղել, երբ իր մոտ տհաճ ախտանիշներ են սկսվել: Նրա խոսքով, ինքը գլխապտույտներ է ունեցել, ուշաթափություն, իսկ երբեմն գլուխն ասես ջրի մեջ լիներ: Տղամարդը վերադարձել է Երեւան եւ դիմել է բժիշկներին: Հայաստանի շատ բժշկական հաստատություններում մերժել էին վիրահատել տղամարդուն, տեսնելով գլխուղեղը սնուցող անոթների բարդ վիճակը եւ սրտի կաթվածի հետեւանքը (արտամղման ֆրակցիան նրա մոտ գրեթե 35 է, երբ նորման 55-ից ավելին է)։ Մի շարք հիվանդանոցներ դիմելուց հետո նա դիմել է «Էրեբունի» ԲԿ, որտեղ նրան վիրահատական միջամտություն է առաջարկվել:
«Էրեբունի» բուժկենտրոնում գնահատել են ռիսկի աստիճանը, ըստ Մեսրոպ Շատախյանի, այն բարձր է եղել, բայց վիրահատության դրական հետեւանքը գերազանցում էր այդ ռիսկերը։ Ավելի ճիշտ` վիրահատությունից հրաժարման դեպքում ուղեղի կաթվածի ռիսկն ավելի բարձր էր, քան սրտի կաթվածինը` վիրահատության դեպքում: Տղամարդուն այդ ամենը բացատրել են եւ առաջարկել են ընտրություն կատարել, եւ նա համաձայնել է վիրահատական միջամտությանը:
Հիվանդի դուստրը պատմել է, որ նա նախկինում ծխել է, իսկ արյան ճնշումը հաճախ բարձրացել է մինչեւ 280 մմ ս ս: Երբ նրա մոտ ստենոզ են ախտորոշել, բժիշկները խստորեն արգելել են ծխելը: Լրագրողների հետ զրույցում տղամարդը խոստովանել է, որ նախկինում ուշադրություն չէր դարձնում բժիշկների հորդորներին, իսկ այժմ հաստատ ամեն ինչում կլսի նրանց:
Հիվանդը վիրահատությունից 5 օր անց դուրս է գրվել բարելավումով, բայց նա պետք է մշտապես բժիշկների հսկողության տակ լինի, որովհետեւ նա մուլտիֆոկալ աթերոսկլերոզ ունի եւ մնացած անոթներն էլ լավ վիճակում չեն:
Կադրեր վիրահատությունից
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր