Հայաստանում դեռ հեմոֆիլիայի դեղամիջոցների պակաս կա

Հայաստանում դեռ հեմոֆիլիայի դեղամիջոցների՝ 8-րդ եւ 9-րդ ֆակտորների զգալի պակաս կա։ Այս մասին NEWS.am Medicine-ի թղթակցի հետ զրույցում ասաց Հեմոֆիլիայով հիվանդների հայկական ընկերության նախագահ Տատյանա Խաչատրյանը։

Նա ասաց, որ հեմոֆիլիայով հիվանդները սովորաբար հաշմանդամ են դառնում՝ հաճախակի տեղի ունեցող արյունազեղումների պատճառով։ Սակայն նրանց հաշմանդամ դառնալը կարելի է կանխել, եթե լինի դեղորայքի բավարար քանակություն եւ իրականացվի պրոֆիլակտիկ բուժում։

«Եթե ծնված օրվանից հեմոֆիլիայով հիվանդ երեխային շաբաթվա մեջ 1-2 անգամ ներարկենք 8-րդ կամ 9-րդ ֆակտորը՝ կախված հիվանդության տեսակից, երեխայի արյան մակարդելիության մակարդակը մոտ կլինի առողջ մարդու մակարդելիության մակարդակին եւ ավելորդ հեմատոմաներ չեն լինի», - ասաց նա, ավելացնելով, որ այդպիսի երեխան կկարողանա նորմալ ուսում ստանալ, դասերից չբացակայել եւ դառնալ հասարակության լիիրավ անդամ։

Սակայն այս պահին Հայաստանում չկան բավարար քանակությամբ դեղամիջոցներ։ Տատյանա Խաչատրյանը նշեց, որ կառավարությունը 2006 թվականից դեղամիջոցներ է գնում, բայց այդ քանակը հազիվ է բավարարում ծայրահեղ վիճակում գտնվող հիվանդներին օգնելու համար, այնպես որ պրոֆիլակտիկ բուժման համար դեղամիջոցներ չեն մնում։

«Այս տարի պետությունը գնել է մոտ 400 000 միավոր, մենք եւս 800 000 միավոր դրսից ենք ներկրել՝ որպես հումանիտար օգնություն։ Ցավոք սրտի, նույնիսկ այսքանը բավական չէ։ Եթե մեր կառավարությունը կարողանա կրկնակի անգամ ավել գնել մոտ տարիներին, մենք կկարողանանք իրականացնել նաեւ պրոֆիլակտիկ բուժում», - ասաց Տատյանա Խաչատրյանը։

Նա ավելացրեց նաեւ, որ զարգացած երկրներում մեկ շնչին հասնող դեղաքանակի բաժինը մեկ միավորից բարձր է։ Համարվում է, որ նույնիսկ մեկ միավորը հերիք չէ նորմալ բուժում իրականացնելու համար։ Հայաստանում այս պահին մեկ շնչին հասնում է մոտ 0.5 միավոր դեղ, բայց Հեմոֆիլիայով հիվանդների հայկական ընկերության անդամները հույս ունեն մոտ ապագայում ավելացնել դեղորայքի քանակը՝ միջազգային չափանիշներին համապատասխան։

«Ունենք բուժման կենտրոն, վերապատրաստված բժիշկներ, հագեցած լաբորատորիա... Միայն ֆակտորի քանակն է պակաս», - ասաց Հեմոֆիլիայով հիվանդների հայկական ընկերության նախագահը։

Տատյանա Խաչատրյանը նշեց նաեւ, որ հեմոֆիլիայի դեղամիջոցները շատ թանկ են։ Ճիշտ է, հեմոֆիլիայի բուժումը Հայաստանում պետպատվերի շրջանակներում է իրականացվում, բայց եթե դեղորայքը չի բավարարում, հիվանդի հարազատները ստիպված են լինում բերել 8-րդ կամ 9-րդ ֆակտորները արտասահմանից, իսկ դրանք շատ թանկ են։

Արյունաբանական կենտրոնի տնօրեն, պրոֆեսոր Սմբատ Դաղբաշյանը հեմոֆիլիայի խնդիրներին նվիրված իր զեկույցում հայտնեց, որ հեմոֆիլիան աշխարհի 7 ամենաթանկարժեք հիվանդություններից մեկն է՝ օրգանների փոխպատվաստման, քրոնիկ նեյրոլեյկոզի եւ մի քանի այլ հիվանդությունների հետ մեկտեղ։

«Յուրաքանչյուր 10 կգ քաշին անհրաժեշտ է 200 միավոր պատրաստուկ, եւ օրինակի համար ասեմ, որ 50 կգ քաշ ունեցող հիվանդի համար միանվագ ներարկումը կազմում է մոտ 1000 ԱՄՆ դոլարին համարժեք դեղորայք», - ասաց Սմբատ Դաղբաշյանը եւ ավելացրեց, որ դեպքեր են լինում, երբ մեկ հիվանդի բուժօգնությունը կազմում է 30-35 հազար ԱՄՆ դոլար։

Հետևեք NEWS.am Medicine-ին Facebook-ում և Twitter-ում