10 հարց, որոնք քաղցկեղի ախտորոշումից հետո ճշտման կարիք ունեն

Քաղցկեղով ախտորոշման հեռանկարը շատերին է սարսափի մեջ պահում: Բայց, այնուամենայնիվ, եթե հիշյալ իրավիճակում եք հայտնվել, Ֆրիհոլդի CentraState բժշկական կենտրոնի օնկոլոգ դոկտոր Բավեշ Բալարը խորհուրդ է տալիս ստորեւ բերված 10 հարցերի պատասխանը գտնել՝ հիվանդության դեմ պայքարի համար պահանջվող ջանքերի ծավալը եւ բուժման լավագույն եղանակը պարզելու համար:

LiveScience Website կայքում հրապարակված հոդվածի հեղինակը հիշեցնում է, որ վերջին 20 տարիների ընթացքում քաղցկեղի բուժմանը միտված բազմաթիվ հայտնագործություններ են իրականացվել, թեեւ հիվանդությամբ ախտորոշված մարդկանց թիվը շարունակում է առնվազն նույնը մնալ: ԱՄՆ բնակիչների պարագայում խոսքը, տարեկան կտրվածքով, ավելի քան մեկ միլիոն մարդկանց մասին է, որոնց գրեթե 50 տոկոսն ի վերջո քաղցկեղի զոհն է դառնում, հաղորդում է NewsMax Health-ը:

Այդուհանդերձ, որքան էլ որ ավերիչ ազդեցությամբ է քաղցկեղի ախտորոշումը աչքի ընկնում, հարկավոր է երեւույթին վերագրվող ամենակարեւոր փաստերի մասին տեղյակ լինել՝ բուժում սկսելու եւ «ճակատամարտի» պատրաստվելու համար: Ընդ որում, ստորեւ բերված հարցերի պատասխանները կարող են նաեւ ընտանիքի անդամներին պետք է գալ՝ իրավիճակը ճիշտ գնահատելու համար: Եւ այսպես՝

Հարց N 1. Արդո՞ք քաղցկեղի տվյալ տեսակը բուժելի է: Ախտորոշված քաղցկեղի շուրջ բոլոր քննարկումները պետք է այս հարցից սկսվեն՝ հեռանկարների մասին հստակ պատկերացում կազմելու համար:

Հարց N 2. Ինչպիսի՞ քաղցկեղ է ինձ մոտ հայտնաբերվել: Որտե՞ղ է այն գտնվում: Որքանո՞վ է տարածված: Նշանակվելիք բուժման բոլոր հնարավոր բաղադրիչները՝ վիրահատություն, քիմիաթերապիա, դեղորայք, ռադիացիա եւ ապաքինում, գրեթե ամբողջությամբ նշված հարցերի պատասխաններից են կախված:

Հարց N 3. Զարգացման ո՞ր փուլում է գտնվում: Հիվանդության զարգացման փուլը եւս վճռորոշ նշանակություն ունի՝ բուժման եղանակի ընտրության հարցում: Փուլավորման նպատակով 0-4 միջակայքն է ընտրվում՝ կախված ուռուցքի չափից, լիմֆային հանգույցների ներգրավվածությունից եւ նախնական զարգացման տեղանքից օրգանիզմի այլ հատվածներ տարածվածության մակարդակից: Հիվանդության զարգացման փուլը ուռուցքի եւ լիմֆային հանգույցների հեռացումից եւ բժշկի կողմից զննման ենթարկվելուց հետո է որոշվում:

Հարց N 4. Կարո՞ղ եմ արդյոք հավելումներ (վիտամիններ, եւն) ընդունել: Հարցի պատասխանը կախված է այն հանգամանքից, թե ինչպիսի քաղցկեղ ունեք եւ ինչպիսի բուժում պետք է նշանակվի: Մարդիկ հաճախ են սննդային հավելումներ ընդունում՝ իմունային համակարգի աշխատանքը խթանելու եւ նյութափոխանակությունը կարգավորելու համար: Սակայն դրանք կարող են նաեւ քաղցկեղի բուժման նպատակով նշանակված թերապիայի արդյունավետությունը նվազեցնել: Բացի այդ, քաղցկեղով ախտորոշված մարդիկ միայն բարձրորակ սնունդ պետք է ընդունեն:

Հարց N 5. Ցավեր ունենալո՞ւ եմ: Ի՞նչ ցավազրկողներ կարող եմ օգտագործել: Քաղցկեղով ախտորոշված հիվանդների մոտ, մեծ ի մասամբ, հիվանդությամբ եւ բուժամիջոցներով հրահրված ցավեր են առաջանում, այնպես որ բուժող մասնագետը կարող է տարբերակներ առաջարկել՝ անցանկալի հետեւանքները մեղմելու համար:

Հարց N 6. Ընտանիքիս անդամներին ու ընկերներիս ե՞րբ կարող եմ ասել: Այս հարցի պատասխանը ձեզնից է կախված: Այդուհանդերձ, դոկտոր Բալարը խորհուրդ է տալիս առաջին հերթին ընտանիքի անդամների (կնոջ, ամուսնու, քրոջ, եղբոր) հետ խոսել: Օնկոլոգը կարող է զրույցի մասնակիցը լինել՝ առաջացած հարցերին պատասխան տրամադրելու եւ մտահոգությունները փարատելու համար:

Հարց N 7. Որո՞նք են ստանդարտ բուժման միջոցները եւ ի՞նչ կողմնակի ազդեցություններ դրանք կարող են ունենալ: Անչափ կարեւոր է նշանակված բուժմամբ ենթադրվող օգուտները, ռիսկերն ու կողմնակի ազդեցությունները հասկանալ: Երբեմն քաղցկեղի դեմ պայքարի այլընտրանքներ են գործում, որոնք կարող են ագրեսիվությամբ եւ կողմնակի ազդեցություններով տարբերվել:

Հարց N 8. Կարո՞ղ եք Ձեր գործընկերներից մեկին խորհուրդ տալ՝ այլընտրանքային կարծիք լսելու համար: Առնվազն երկու այլընտրանքային կարծիք լսելու գաղափարը կարող է բուժման լավագույն եղանակի վճռորոշ ընտրության հանգեցնել:

Հարց N 9. Ինչպե՞ս է բուժումն ամենօրյա կյանքիս վրա անդրադառնալու: Քաղցկեղի դեմ նշանակված բուժումը կարող է այնքան դժվար անցնել եւ այնպիսի ուժասպառության հասցնել հիվանդին, որ վերջինս պետք է անպայման տեղյակ լինի դրա հետեւանքների մասին: Բուժման ընթացքում աշխատանքը, սոցիալական շփումները եւ ֆիզիկական վարժությունները շարունակելու հեռանկարը կարող է որոշ չափով ապագայի նկատմամբ անհանգստությունը մեղմել: 

Հարց N 10. Աջակցություն տրամադրող ի՞նչ ծառայություններ գոյություն ունեն: Քաղցկեղի ֆիզիկական, էմոցիոնալ եւ ֆինանսական հետեւանքներին դիմակայումը չի կարող հեշտ անցնել՝ առանց ընտանիքի անդամների եւ ընկերների աջակցության: Սակայն գոյություն ունեն նաեւ մասնագիտական ծառայություններ, ներառյալ ցավամոքիչ խնամք առաջարկող հաստատությունները, որոնք կարող են հիվանդին, սրթեսի եւ լարվածության մակարդակի առումով, նկատելի թեթեւություն պատճառել:

Հետևեք NEWS.am Medicine-ին Facebook-ում և Twitter-ում